اسلام آباد۔ 14 جنوری (اے پی پی) وزیراعظم محمد شہباز شریف پاکستان دی ڈیجیٹل مالیاتی منڈیاں اچ ودھدی ہوئی بین الاقوامی دلچسپی کوں سراہندیں ہوئیں پاکستان دے تیزی نال عالمی ڈیجیٹل فنانس دا حصہ بݨݨ تے اطمینان دا اظہار کیتے۔ وزیراعظم آفس دے میڈیا ونگ ولوں جاری بیان دے مطابق وزیراعظم محمد شہباز شریف نال امریکی کمپنی ”ورلڈ لبرٹی فنانشل“ دے چیف ایگزیکٹو آفیسر زچری وٹکوف دی قیادت اچ وفد …
وزیراعظم شہباز شریف نال ورلڈ لبرٹی فنانشل دے وفد دی ملاقات، پاکستان دے نال ڈیجیٹل ادائیگی دے نظام اچ جدت کیتے مفاہمتی یادداشت تے دستخط
اسلام آباد۔ 14 جنوری (اے پی پی) وزیراعظم محمد شہباز شریف پاکستان دی ڈیجیٹل مالیاتی منڈیاں اچ ودھدی ہوئی بین الاقوامی دلچسپی کوں سراہندیں ہوئیں پاکستان دے تیزی نال عالمی ڈیجیٹل فنانس دا حصہ بݨݨ تے اطمینان دا اظہار کیتے۔ وزیراعظم آفس دے میڈیا ونگ ولوں جاری بیان دے مطابق وزیراعظم محمد شہباز شریف نال امریکی کمپنی ”ورلڈ لبرٹی فنانشل“ دے چیف ایگزیکٹو آفیسر زچری وٹکوف دی قیادت اچ وفد بدھ کوں اتھاں ملاقات کیتی جیندے اچ نائب وزیراعظم اتے وزیر خارجہ سینیٹر محمد اسحاق ڈار، چیف آف آرمی سٹاف فیلڈ مارشل سید عاصم منیر، وزیر خزانہ محمد اورنگزیب، وزیراعظم دے خصوصی معاون سید طارق فاطمی اتے چیئرمین پاکستان ورچوئل اثاثہ جات ریگولیٹری اتھارٹی بلال بن ثاقب وی موجود ہن۔ ایں موقع تے ڈیجیٹل ادائیگیاں اچ جدت کیتے پاکستان دے نال مفاہمتی یادداشت تے دستخط کیتے ڳئے۔ وزیراعظم وفد دا خیرمقدم کریندے ہوئیں ڈیجیٹل پاکستان دے حوالے نال آپݨا وژن پیش کیتا جیندے مقصد شہریوں کوں زیادہ بہتر رابطے، رسائی تے شفاف ذرائع دی سہولت کوں ودھاوݨ اے۔ انھاں آکھیا جو ڈیجیٹل ادائیگیاں تے مالیاتی جدت دی تیزی نال ودھدی ہوئی رفتار پاکستان دی وسعت اختیار کریندی ڈیجیٹل معیشت دا ہک اہم حصہ اے۔ وزیراعظم پاکستان دی ڈیجیٹل مالیاتی منڈیاں وچ ودھدی ہوئی بین الاقوامی دلچسپی کوں سراہندے ہوئیں اطمینان دا اظہار کیتا جو پاکستان تیزی نال عالمی ڈیجیٹل فنانس دا حصہ بݨدا ویندا پئے۔ ایں موقع تے زچری وٹکوف محفوظ تے شفاف ڈیجیٹل ادائیگی دے نظام کیتے پاکستان دے نال تعاون اچ گہری دلچسپی ظاہر کیتی جیندے اچ سرحد پار ادائیگیاں تے زرِ مبادلہ دے عمل اچ جدت شامل اے۔ انھاں پاکستان دے پالیسی فریم ورک کوں سراہیا جیندے پاروں پاکستان عالمی ڈیجیٹل فنانس دے منظرنامے اچ تیزی نال ابھردا پئے۔ انھاں آئندہ دور دے تقاضیاں کوں سامݨے رکھیندیں ہوئیں ڈیجیٹل ادائیگیاں تے سرحد پار لین دین اچ جدت دے امکانات تلاش کرݨ کیتے پاکستان دے نال تعاون کوں ٻیا ودھاوݨ دی خواہش دا اظہار کیتا۔ ایں موقع تے حکومتِ پاکستان تے ایس سی فنانشل ٹیکنالوجیز ایل ایل سی (جیہڑی ورلڈ لبرٹی فنانشل دی منسلک کمپنی اے) وچال مفاہمتی یادداشت (MoU) تے دستخط کیتے ڳئے۔ وزیر خزانہ محمد اورنگزیب تے ورلڈ لبرٹی فنانشل دے سی ای او زچری وٹکوف مفاہمتی یادداشت تے دستخط کیتے۔ ایں مفاہمتی یادداشت دا مقصد سرحد پار لین دین کیتے درکار ڈیجیٹل ادائیگی دے نظام تے باضابطہ ڳالھ مہاڑ تے تکنیکی مہارت کوں ودھاوݨ اے۔
