سپیکر قومی اسمبلی سردار ایاز صادق نال آسٹریلیا دے ہائی کمشنر دی ملاقات

اسلام آباد۔ 14 جنوری (اے پی پی) سپیکر قومی اسمبلی سردار ایاز صادق نال آسٹریلیا دے ہائی کمشنر ٹموتھی کین پارلیمنٹ ہاؤس وچ ملاقات کیتی جیندے وچ ݙو طرفہ تعلقات سودھے اہم علاقائی تے عالمی امور تے ڳالھ مہاڑ کیتی ڳئی ، ݙو طرفہ تعاون ودھاوݨ تے وی اتفاق کیتا ڳئے۔قومی اسمبلی سیکرٹریٹ موجب سپیکر سردار ایاز صادق ݙوہیں ملکاں وچال دوستانہ تعلقات کوں مزید مستحکم بݨاوݨ دے عزم دا اعادہ کریندے آکھیا جو پارلیمانی سفارت کاری ݙو طرفہ تعلقات کوں تکڑا بݨاوݨ وچ اہم کردار ادا کرسڳدی اے۔ انھاں آکھیا جو پاکستان وچ اقتصادی شعبیں بالخصوص لائیو سٹاک تے مائننگ  دے شعبیں وچ سرمایہ کاری دے ڈھیر موقع موجود ہن۔انھاں دا آکھݨ ہئی جو پاکستان معدنی وسائل نال مالا مال اے، دنیا دے سرمایہ کار اساݙے معدنی وسائل وچ دلچسپی گھندے پئن۔ سپیکر آکھیا جو قومی اسمبلی وچ قائم پاک-آسٹریلیا پارلیمانی فرینڈ شپ گروپ ݙوہیں ملکاں دی پارلیمان دے وچال فعال کردار ادا کریندا پئے ۔آسٹریلوی ہائی کمشنر آکھیا جو پاکستانی قوم ثابت قدم تے مہمان نواز قوم اے، آسٹریلوی سرمایہ کار مائننگ دے شعبے وچ پاکستان وچ سرمایہ کاری کرݨ چاہندن۔ انھاں آکھیا جو آسٹریلیا پاکستان دے نال اپݨے پراݨے خوشگوار تعلقات کوں ٻہوں اہمیت ݙیندے، پاکستانی تارکینِ وطن دی ٻہوں وݙی تعداد آسٹریلیا دی تعمیر و ترقی وچ اہم کردار ادا کریندی پئی اے۔ آسٹریلوی ہائی کمشنر پاکستان دے جمہوری نظام تے پارلیمانی اداریں دے کردار کوں دی وی تعریف کیتی۔