صدر مملکت آصف علی زرداری دی بحرین دے فرماں روا شاہ حمد بن عیسیٰ آل خلیفہ نال ملاقات

منامہ۔ 14 جنوری (اے پی پی) صدر مملکت آصف علی زرداری قصر القضیبیہ وچ بحرین دے فرماں روا عزت مآب شاہ حمد بن عیسیٰ آل خلیفہ نال ملاقات کیتی اے۔ ملاقات وچ پاکستان تے مملکت بحرین وچال نیڑے تے برادرانہ تعلقات مزید مضبوط بݨاوݨ کیتے جامع ڳالھ مہاڑ کیتی ڳئی ۔ایوان صدر دے پریس ونگ توں جاری بیان موجب ملاقات وچ ݙوہیں رہنماواں سانجھے تعاون کوں عملی جہت ݙیوݨ تے ݙوطرفہ رابطے کوں نویں رفتار ݙیوݨ دے عزم دا اظہار کیتا۔ صدر مملکت دے رلے خاتونِ اول بی بی آصفہ بھٹو زرداری، سینیٹر سلیم مانڈی والا تے وزیر زراعت بلوچستان میرعلی حسن زہری وی موجود ہن۔

محل پُڄݨ تے صدر مملکت آصف علی زرداری کوں گارڈ آف آنر پیش کیتا ڳیا۔

شاہ حمد بن عیسیٰ آل خلیفہ پاکستان-بحرین تعلقات دے ودھارے وچ خدمات دے اعتراف وچ صدر آصف علی زرداری کوں مملکت بحرین دا اعلیٰ ترین اعزاز “آرڈر آف شیخ عیسیٰ بن سلمان آل خلیفہ” (فرسٹ کلاس) عطا کیتا۔

صدر مملکت قصر القضیبیہ دی وزیٹرز بک وچ اپݨے تاثرات وی لکھئے۔صدر آصف علی زرداری شروع اچ شاہ حمد بن عیسیٰ آل خلیفہ نال ون آن ون ملاقات کیتی۔ ݙوہیں رہنماواں پاکستان-بحرین تعلقات دی مجموعی صورتحال دا جائزہ ڳھدا تے انھاں دی مثبت سمت تے اطمینان دا اظہار کیتا۔ صدرمملکت شاہِ بحرین تے بحرینی قیادت ولوں ݙتی ڳئی گرمجوشی تے شاندار مہمان نوازی تے شکریہ ادا کیتا تے پاکستان کیتے شاہِ بحرین دی مستقل خیرسگالی دی تعریف کیتی۔انھاں سیاسی، اقتصادی، دفاعی تے ثقافتی شعبیں وچ تعاون دے دائرے کوں وسعت ݙیوݨ دے پاکستان دے عزم دا اعادہ کیتا تے شاہِ بحرین کوں پاکستان دے سرکاری دورے دی دعوت ݙتی۔بعد وچ تھیوݨ آلی توسیعی ملاقات وچ ݙوہیں فریقین تجارت تے سرمایہ کاری دے تعاون کوں ودھاوݨ دے ٹھوس طریقیں تے ڳالھ کیتی۔ صدرمملکت آصف علی زرداری ایں ڳالھ تے زور ݙتا جو مضبوط سیاسی تعلقات کوں ودھدی تجارت تے گہرے سرمایہ کاری رابطے وچ تبدیل کیتا ونڄݨا چاہیدے۔ انھاں بحرینی سرمایہ کاراں کوں پاکستان دے ترجیحی شعبیں جنھاں وچ زراعت و غذائی تحفظ، آئی ٹی تے ڈیجیٹل خدمات، صحت، سیاحت تے بنیادی ڈھانچہ شامل ہن، وچ موقع تلاش کرݨ دی دعوت ݙتی تے غیر ملکی سرمایہ کاراں دی معاونت وچ سپیشل انویسٹمنٹ فسیلیٹیشن کونسل (SIFC) دے سہولت کار کردار کوں اجاگر کیتا۔صدر مملکت آکھیا جو پاکستان بحرین کوں ہک اہم اقتصادی شراکت دار سمجھدے تے نیڑےٖ تعاون نال ݙوہیں ملکاں کیتے سانجھے فیدہ مند موقع پیدا تھی سڳدن۔ انھاں پائیدار ترقی تے مشترکہ خوشحالی کیتے مشترکہ منصوبیں دی حوصلہ افزائی کیتی۔ صدرآصف علی زرداری ݙوہیں ملکاں وچال طویل عرصے توں قائم دفاعی تے سکیورٹی تعاون کوں ݙو طرفہ تعلقات دا ستون قرار ݙتا تے مسلح افواج وچال نیڑے ادارہ جاتی رابطے دا ذکر کریندے ایں شراکت داری کوں مزید مضبوط بݨاوݨ دی خواہش دا اظہار کیتا۔علاقائی تے بین الاقوامی امور تے ڳالھ کریندے صدر مملکت آکھیا جو عالمی برادری ایں ویلھے غیر یقینی تے تکھی رفتار تبدیلیاں دے ہک اوکھے دور وچوں لنگھدی پئی اے ۔ انھاں ایں امر تے زور ݙتا جو ابھردے ہوئے عالمی نظام دے چیلنجز دا مقابلہ کرݨ کیتے قوماں کوں متحد رہݨا ہوسی، کیوں جو ہک خطے دے عدم استحکام دے اثرات ٻئے تے وی پئے سڳدن۔ انھاں اتحاد، ثابت قدمی، دانشمندی تے ضبط کوں آئندہ دور دی بنیادی اقدار قرار ݙتا تے آکھیا جو اجتماعی عزم دے ذریعے نہ صرف اوکھ تے قابو پاتا ونڄ سڳدے بلکہ ترقی وی ممکن اے۔صدر آصف علی زرداری بحرین وچ رہݨ آلے پاکستانی برادری کوں ݙوہیں ملکاں وچال ہک اہم پل قرار ݙیندے انھاں کوں خراجِ تحسین پیش کیتا۔ انھاں بحرینی قیادت دا شکریہ ادا کیتا جو او مملکت وچ مقیم تے کم کرݨ آلے ہک لکھ سولہ ہزار توں ودھ پاکستانیاں کوں عزت، موقع تے معاونت ݙیندی پئی اے ۔ انھاں اسلام آباد وچ کنگ حمد یونیورسٹی نرسنگ اینڈ الائیڈ میڈیکل سائنسز دے قیام کوں شاہِ بحرین دا ہک فراخدلانہ تحفہ قرار ݙتا۔ݙوہیں رہنماواں امن، استحکام تے کثیرالجہتی نظام کیتے مشترکہ عزم دا اعادہ کیتا تے علاقائی چیلنجز دے حل کیتے مکالمے تے سفارت کاری دی اہمیت تے زور ݙتا۔ انھاں اقوامِ متحدہ سودھے بین الاقوامی فورمزتےبالخصوص امتِ مسلمہ متعلق مشترکہ امور تے مربوط کوششاں دی لوڑھ تے اتفاق کیتا۔صدرآصف علی زرداری دے اعزاز وچ ݙتی ڳئی ضیافت نال خطاب کریندے شاہ حمد بن عیسیٰ آل خلیفہ پاکستان تے بحرین کوں سانجھے احترام، اسلامی اخوت تے مشترکہ مفادات تے مبنی تاریخی تعلقات دے حامل بھرا ملک قرار ݙتا۔ انھاں صدرمملکت دے دورے کوں ݙوطرفہ تعلقات دے مزید استحکام دے پاسے ہک اہم سنگ میل قرار ݙتا تے سیاسی، اقتصادی، تجارتی تے ترقیاتی شعبیں وچ تعاون ودھاوݨ دے بحرین دے عزم دا اعادہ کیتا۔ شاہِ بحرین پاکستان ولوں بحرین دی مسلسل حمایت، پاکستانی برادری دی مثبت خدمات، عرب تے اسلامی دنیا دے مسئلیں وچ پاکستان دے کردار تے علاقائی و بین الاقوامی امن و استحکام کیتے پاکستان دی کوششاں دی تعریف کیتی۔ایں موقع تے پاکستان وچ بحرین دے سفیر محمد ابراہیم عبدالقادر تے بحرین وچ پاکستان دے سفیرثاقب رؤف وی موجود ہن۔ بحرین دی طرفوں کمانڈر بحرین نیشنل گارڈ شیخ محمد بن عیسیٰ آل خلیفہ تے وزیر خارجہ بحرین شیخ ڈاکٹر عبداللطیف بن راشد الزیانی وی ملاقات وچ شرکت کیتی۔