اکادمی ادبیات پاکستان دی “چائے، باتیں اور کتابیں” دی 70 ویں غیر رسمی نشست، محبوب تابش دی کتاب ”پاݨی ست کھوہیں دا“ تے ڳالھ مہاڑ

اسلام آباد۔ 14 جنوری(اے پی پی) اکادمی ادبیات پاکستان دے مقبول ہفتہ وار سلسلے “چائے، باتیں اور کتابیں” دی 70 ویں غیر رسمی نشست ڈٻھ کوں تھئی۔ نشست دے اعزازی منتظم جناب منیر فیاض مہمان شاعراں، ادیباں تے خاص طور تے سرائیکی ادب نال تعلق رکھݨ آلے سنگتیاں کوں ست بسم اللہ آکھیا۔ شرکا سرائیکی مہاندرے محبوب تابش دی کتاب ”پاݨی ست کھوہیں دا“ تے ڳالھ مہاڑ کیتی تے ایں زور ݙتا جو روایت نال جڑیا رہݨ ٻہوں ضروری اے، کتاب اچ پراݨی تہذیب اتے ثقافت دا ذکر ایں کیتے اہم اے جو اے انسانی تاریخ، معاشرتی ارتقا اتے فکری سفر دی ہک محفوظ دستاویز ہوندی اے، قدیم تہذیباں دے رسم و رواج، عقائد، زبان، فنون اتے طرزِ زندگی کوں ادبی اتے تاریخی کتاباں دے ذریعے آوݨ والیاں نسلاں تئیں منتقل کیتا ویندے ۔

اے لکھیا ہویا سرمایہ نہ صرف ماضی کوں سمجھݨ وچ مدد ݙیندے ٻھل حال اتے مستقبل کیتے وی رہنمائی ݙکھیندے۔ کتاباں اچ محفوظ تہذیبی ورثہ قوماں دی سنڄاݨ کوں برقرار رکھدے اتے اے احساس ڄڳیندے جو ساݙیاں ثقافتی بنیاداں کتنی گہریاں اتے قیمتی ہن۔ نشست دے شرکا دا آکھݨ ہئی جو روایت نال جڑیا رہݨ ایں کیتے ضروری اے جو روایت کہیں قوم دی تہذیبی یادداشت، فکری تسلسل تے اجتماعی سنڄاݨ کوں محفوظ رکھدی اے ۔ روایت ساکوں اپݨے ماضی نال جوڑیندی اے تے حال کوں معنی عطا کریندی اے، کیوں جو ایندے بغیر بندہ اتے معاشرہ جڑت توں کٹ تے بے سمت تھی ویندے۔ زبان، ادب، رسم و رواج تے اقدار دے ذریعے روایت نسل در نسل منتقل تھیندی اے اتے نویاں تبدیلیاں کوں قبول کریندے ہوئیں وی اپݨی بنیاد برقرار رکھدی اے ۔ روایت انسان کوں اے شعور ݙیندی اے جو ترقی صرف ماضی کوں رد کرݨ دا ناں کائنی ٻھل اوکوں سمجھ تے اڳوں ودھݨ دا عمل اے، ایں کیتے روایت نال جڑت تہذیبی بقا اتے فکری توازن کیتے لازم تھیسی۔

تقریب اچ شرکا خواجہ غلام فرید سئیں دی شاعری دا ذکر کیتا تے آکھیا جو خواجہ غلام فرید سئیں کولو فطرت صرف ہک پچھوکڑ کائنی ٻھل ہک روحانی تجربے دی علامت اے ۔ انہاں سرائیکی زبان کوں فکری وقار عطا کیتے۔ انہاں دے کلام اچ سرائیکی لوک روایت اتے صوفیانہ فکر دا ہک سوہݨا ملاپ ملدے جیہڑا انہاں دی شاعری کوں ثقافتی اتے روحانی ݙوہیں پدھراں تے اہم بݨیندے۔ سنگتیاں آکھیا جو ہک ادیب کیتے اے ضروری اے جو او سارے علوم دا مطالعہ کرے تاں جو او اپݨا ٹھوس موقف قائم رکھ سکے۔ آخر اچ “چائے، باتیں اور کتابیں” اچ اقبال افکار، طیب کامران، محترمہ حبیبہ طلعت، اویس، سجاد، محمد آصف، عقیل، سمیع الرحمان، جناب آفاق شاہد، اظہر ملک ایڈوکیٹ، محبوب تابش، محترمہ ڈاکٹر سعدیہ کمال، محمد عارف، اختر عثمان، خلیل احمد بلوچ ایڈوکیٹ، زیڈ اے قریشی، صلاح الدین درویش، نجیب اللہ انجم، تجمل شاہ، محترمہ زیتون بی بی، الطاف حسین، منتظم اعزازی منیر فیاض اتے ٻئے شامل ہن۔

( رپورٹ: ڈاکٹر سعدیہ کمال) سرائیکی نیوز سروس۔ اسلام آباد