وزیراعظم شہباز شریف دی صدارت پاکستان ریلویز اچ جاری اصلاحات تے ترقی دے حوالے نال نجی شعبے دے ماہرین دے نال مشاورتی اجلاس، پاکستان ریلویز بامعنی مشاورت دے بعد عملی اقدامات تے مشتمل روڈ میپ آندے ہفتے پیش کرے، وزیراعظم

اسلام آباد۔ 15 جنوری (اے پی پی) وزیراعظم محمد شہباز شریف پاکستان ریلویز اچ ادارہ جاتی تے انتظامی کارکردگی کوں ٻیا موثر بݨاوݨ کیتے انقلابی اقدامات کوں ناگزیر قرار ݙیندیں ہوئیں ہدایت کیتی جو پاکستان ریلویز بامعنی مشاورت دے بعد عملی اقدامات تے مشتمل روڈ میپ آندے ہفتے پیش کرے۔ وزیراعظم محمد شہباز شریف دی صدارت پاکستان ریلویز اچ جاری اصلاحات تے ترقی دے حوالے نال نجی شعبے دے ماہرین دے نال مشاورتی اجلاس تھیا۔ وزیراعظم آفس دے میڈیا ونگ توں خمیس کوں جاری بیان دے مطابق اجلاس اچ وفاقی وزیر ریلوے محمد حنیف عباسی، وفاقی وزیر خزانہ محمد اورنگزیب، وفاقی وزیر اطلاعات و نشریات عطا اللہ تارڑ، وفاقی وزیر موسمیاتی تبدیلی مصدق ملک، وفاقی وزیر اقتصادی امور احد خان چیمہ، وزیراعظم دے معاون خصوصی ہارون اختر، نیشنل کوآرڈینیٹر ایس آئی ایف سی لیفٹیننٹ جنرل (ر) سرفراز احمد تے متعلقہ وزارتاں دے سیکرٹریز تے حکام دے علاوہ نجی شعبے دے ماہرین زید بشیر، پیر سعد احسان الدین تے ٻیاں شرکت کیتی۔ وزیراعظم مجموعی معاشی ترقی، علاقائی صنعت و تجارت اچ تعاون تے عوامی سہولت تے کمرشل استعمال کیتے ریلویز دی معیاری کارکردگی دی اہمیت کوں اجاگر کریندیں ہوئیں دستیاب ذرائع تے معاشی مسئلیاں دے باوجود بہترین کارکردگی تے وزارتِ ریلویز دی تمام ٹیم کوں شاباش ݙتی۔ وزیراعظم وزارتِ ریلویز دے وسائل دے کمرشل استعمال کیتے جامع حکمتِ عملی جلد از جلد مرتب کرݨ دی خصوصی ہدایات ݙتیاں۔ وزیراعظم آکھیا جو معیشت دی مجموعی ترقی، صنعت و تجارت تے ٻئے شعبہ جات دی بہتری اچ نجی شعبے دے ماہرین نال مشاورت حکومت دے معاشی اصلاحات دا حصہ اے، پاکستان ریلویز تھوڑے وسائل دے باوجود نہایت تندہی تے محنت نال موثر کارکردگی دا مظاہرہ کریندا پئے جیندے تے وفاقی وزیر ریلویز تے انھاں دی ٹیم لائقِ تحسین اے۔ انھاں ہدایت کیتی جو پاکستان ریلویز ساری متعلقہ اکائیاں تے اداریاں نال بامعنی مشاورت دے بعد عملی اقدامات تے مشتمل روڈ میپ آندے ہفتے پیش کرے۔ وزیراعظم آکھیا جو آندے سال دے پی ایس ڈی پی (PSDP) اچ ریلویز دے ترقیاتی منصوبیاں کوں متناسب بجٹ ݙتا ویسے ۔انھاں ریلویز دے ڈھانچے دے منافع بخش کمرشل استعمال کیتے پرائیویٹ پارٹنرشپ دے امکانات دا بھرپور جائزہ گھنݨ دی وی ہدایت کیتی۔