وفاقی وزیر داخلہ محسن نقوی تے وزیراعلیٰ بلوچستان میر سرفراز بگٹی دا شہید میجر انور کاکڑ دے گھر دا دورہ، اہلخانہ نال تعزیت تے عظیم قربانی تے خراجِ عقیدت پیش کیتا

کوئٹہ۔ 15 جنوری (اے پی پی) وفاقی وزیر داخلہ محسن نقوی تے وزیراعلیٰ بلوچستان میر سرفراز بگٹی کوئٹہ اچ شہید میجر انور کاکڑ دی رہائش گاہ دا دورہ کیتا، ݙوہاں رہنماواں شہید دی والدہ، بھراواں تے معصوم پتراں نال ملاقات کیتی اتے “فتنہ الہندوستان” دے بزدلانہ حملے اچ جامِ شہادت نوش کرݨ آلے بہادر پتر دی عظیم قربانی کوں زبردست الفاظ اچ خراجِ عقیدت پیش کیتا۔ ایں موقع تے صوبائی وزراء، چیف سیکرٹری بلوچستان تے آئی جی پولیس بلوچستان وی نال ہن۔ محسن نقوی تے میر سرفراز بگٹی شہید دے ایصالِ ثواب کیتے فاتحہ خوانی کیتی تے پسماندگان کیتے صبر و استقامت دی دعا کیتی۔ ملاقات دے دوران شہید میجر انور کاکڑ دی والدہ دے بلند حوصلے ساریاں دے دل جیت گھدے۔ انھاں فخر نال آکھیا جو میݙا پتر شیر ہئی جیہڑا وطن تے قربان تھی ڳئے، میݙے باقی ݙو پتر وی ملک کیتے حاضر ہن۔ وزیر داخلہ محسن نقوی شہید دے ٻئے پتر دا وی ایچی سن کالج اچ داخلہ کراوݨ دا اعلان کیتا اتے ٻالاں کوں پیار تے دلاسہ ݙتا۔ وزیراعلیٰ سرفراز بگٹی شہید دے بھرا خدائیداد خان کوں سرکاری ملازمت ݙیوݨ دا اعلان کیتا۔ وزیراعلیٰ اعلان کیتا جو کوئٹہ دے ہک سکول کوں شہید میجر انور کاکڑ دے ناں نال منسوب کیتا ویسے۔ وفاقی وزیر داخلہ محسن نقوی شہید دی والدہ کوں مخاطب کریندیں ہوئیں آکھیا جو تساں پاکستان دے بہادر پتر دی باہمت والدہ ہیوے تے پوری قوم کوں تساݙے تے فخر اے ۔ وزیراعلیٰ بلوچستان سرفراز بگٹی آکھیا جو قوم آپݨے ہیروز دی قربانیاں کوں کݙاہیں نہ بھلسی۔