وزیر اعظم شہباز شریف نال آذربائیجان دے وفد دی ملاقات

اسلام آباد۔ 15 جنوری(اے پی پی) وزیر اعظم محمد شہباز شریف نال آسان خدمت مرکز اسلام آباد دی افتتاحی تقریب اچ شرکت کیتے آئے آذربائیجان دے وفد ملاقات کیتی۔ وفد بطور خادمِ پنجاب اتے ہݨ بطور وزیر اعظم ملک اچ اصلاحات اتے نظام اچ جدت گھن آوݨ تے وزیر اعظم کوں خراجِ تحسین پیش کیتا۔ ملاقات اچ آذربائیجان دے پبلک سروس اتے سوشل سروس دے چیئرمین علوی مہدئیو، آذربائیجان دے پاکستان اچ سفیر خضر فرہادوف، وفاقی وزراء احد خان چیمہ، عطا اللہ تارڑ، شزہ فاطمہ خواجہ اتے معاون خصوصی طارق فاطمی وی موجود ہن۔ ملاقات اچ اسلام آباد اچ پاکستان دے پہلے آسان خدمت مرکز بارے بریفنگ ݙتی ڳئی۔ ݙسایا ڳیا جو شہریاں دی سہولت کیتے سیکٹر G-9 اچ قائم پہلے خدمت سینٹر دی تیکھے توسیع کیتی ویسی۔ آذربائیجان دی حکومت پاکستان اچ آسان خدمت مراکز دے قیام سانڳے ودھ ہتھ ونݙاوݨ دا آکھیے۔ آذربائیجان دے سفیر ݙسایا جو اسلام آباد اتے آذربائیجان وچال ہفتہ وار ترائے پروازاں دے علاوہ مارچ اچ ہک ٻئی پرواز ودھائی ویسی۔ وزیر اعظم آکھیا جو ملک بھر اچ وفاقی حکومت دیاں خدمات کوں ہک چھت ہیتھ ݙیوݨ کیتے ٻعے وی مرکز بݨائے ویسن، اگلے مرحلے اچ آزاد جموں و کشمیر اتے گلگت بلتستان اچ وی اے مرکز بݨسن اتے بیرونِ ملک مقیم پاکستانیاں دی سہولت کیتے سفارت خانیاں اچ وی کائونٹر بݨائے ویسن۔