وزیر خزانہ محمد اورنگزیب نال عالمی بینک دے وفد دی ملاقات

اسلام آباد۔ 15 جنوری(اے پی پی) پاکستان اتے عالمی بینک مجوزہ مداخلتاں دے دائرہ کار کوں محدود اتے موثر بݨاوݨ، ترجیحات اچ مزید بہتری اتے مستقبل دے عالمی بینک دے تعاون نال چلݨ والے پروگراماں کوں کنٹری پارٹنرشپ فریم ورک تے اقتصادی اصلاحات دے ایجنڈے نال ہم آہنگ کرݨ کیتے تکنیکی سطح دے رابطے جاری رکھݨ تے اتفاق کیتے۔ اے اتفاق وفاقی وزیر خزانہ و محصولات سینیٹر محمد اورنگزیب اتے پاکستان اچ عالمی بینک دی کنٹری ڈائریکٹر بولورما اَمگابازر دی قیادت اچ عالمی بینک دی متعلقہ ٹیماں وچال ملاقات اچ تھئے۔ ملاقات دا مقصد پاکستان نال عالمی بینک دے کنٹری پارٹنرشپ فریم ورک دے تحت جاری تعاون دا جائزہ گھنݨ اتے ترجیحی شعبیاں تے الاوݨ ہئی۔ عالمی بینک دی ٹیم وزیرِ خزانہ کوں کنٹری پارٹنرشپ فریم ورک دے تحت جاری آپریشنز اتے منصوبیاں اچ پیش رفت دا ݙسایا جیندے اچ مالیاتی اتے محصولات بارے اصلاحات، معاشی استحکام کیتے کوششاں اتے پالیسی تے مبنی شراکت داریاں اچ پیش رفت شامل ہئی۔ عالمی بینک نجی سرمایہ کاری اچ تیزی گھن آوݨ دی اہمیت تے زور ݙتا اتے نشاندہی کیتی جو سرمایہ کاری دی موجودہ سطح کنٹری پارٹنرشپ فریم ورک دے مقررہ ہدف توں گھٹ اے۔ عالمی بینک واضح پالیسی سنگِ میل، کارکردگی دے اشاریے تے عملدرآمد اچ معاونت کیتے ہدفی تکنیکی مدد تے مشتمل نتائج تے مبنی طریقہ کار دی تجویز ݙتی۔ وزیر خزانہ ݙسایا جو ڈھانچہ جاتی اصلاحات پہلے ہی جاری ہین جیندے اچ ٹیرف دی معقول تنظیمِ نو، سرکاری اداریاں دے نظم و نسق اچ بہتری، ضابطہ جاتی نظام دی جدید کاری اتے شفافیت دے اقدامات شامل ہن۔ انھاں کیپٹل مارکیٹس کوں وسعت ݙیوݨ، طویل المدتی مالی وسائل تئیں رسائی ودھاوݨ اتے نجی شعبے دی قیادت اچ ترقی کیتے ادارہ جاتی ہم آہنگی کوں مضبوط بݨاوݨ دی اہمیت تے وی زور ݙتا۔ ملاقات اچ روزگار اتے مہارتاں دی ترقی کوں معاشی نمو دا ہک کلیدی ستون قرار ݙیندے ہوئیں ایںندے تے تفصیلی الایا۔ ڈیجیٹل خدمات دی برآمدات، زراعت اتے ایگری بزنس، معدنیات اتے کان کنی، صحت، تے منتخب مینوفیکچرنگ شعبیاں کوں وی آندے عالمی بینک دی معاونت نال چلݨ والے منصوبیاں کیتے ممکنہ ترجیحی شعبیاں دے طور تے زیرِ بحث لایا ڳیا۔ عالمی بینک وزیرِ خزانہ کوں مستقبل دے ممکنہ منصوبیاں دے تحت پالیسی تے مبنی ضمانتاں دے استعمال دا وی ݙسایا جیندے نال پاکستان دے ذمے واجبات دا بہتر انتظام، مہانگے قرضیاں دی ری فنانسنگ اتے جدید مالیاتی طریقہ کار کوں فروغ ملسی، ٻھل اے سب کڄھ طے شدہ پالیسی اہداف دے حصول نال مشروط ہوسی۔