وزیراعظم اسلام آباد، آزاد جموں و کشمیر اتے گلگت بلتستان دے شہریاں کیتے وزیراعظم صحت کارڈ پروگرام دا اجرا کر ݙتے

اسلام آباد۔ 16 جنوری(اے پی پی) وزیراعظم محمد شہباز شریف وفاقی دارالحکومت اسلام آباد، آزاد جموں و کشمیر اتے گلگت بلتستان دے شہریاں دے مفت علاج کیتے وزیراعظم صحت کارڈ پروگرام دا اجرا کر ݙتے۔ وزیر اعظم آکھیے جو صحت کارڈ دا اجرا عوامی فلاح دے عزم دا تسلسل اے، علاج تے صحت دیاں سہولتاں دا حصول عوام دا بنیادی حق اے اتے ریاست دی ذمہ داری اے جو او کمزور طبقے دا سہارا ٻݨے۔ اے ڳالھ انہاں اسلام آباد اچ وزیراعظم صحت کارڈ دی افتتاحی تقریب نال خطاب کریندے ہوئیں کیتا۔ وزیراعظم آکھیا جو 2016 اچ سابق وزیراعظم محمد نواز شریف ایں پروگرام دا آغاز کیتا ہئی جیندے نال لکھاں خاندان مستفید تھئن۔ انھاں آکھیا جو صحت توں ودھ قیمتی چیز کوئی کائنی، صحت ہوسی تاں تعلیم، کھیݙاں اتے زندگی دے ہر شعبے اچ سرگرمیاں جاری رہ سڳسن۔ انھاں وفاقی وزیر صحت مصطفیٰ کمال اتے انھاں دی ٹیم کوں مبارکباد ݙتی۔ وزیراعظم آکھیا جو اشرافیہ تاں ٻاہرلے ملکاں توں علاج کرا سڳدی اے ٻھل غریب طبقے کیتے ٻہوں مشکلات ہین۔ انھاں ہدایت کیتی جو تھرڈ پارٹی دے ذریعے پروگرام اچ شفافیت کوں یقینی بݨایا ونڄے۔ انھاں آکھیا جو سندھ اچ وی ایں پروگرام دے اجرا دی تجویز قابلِ غور اے اتے ایں حوالے نال وزیراعلیٰ سندھ نال ڳالھ کیتی ویسی۔ وفاقی وزیر صحت مصطفیٰ کمال ݙسایا جو ایں پروگرام نال ہک کروڑ توں ودھ لوکاں کوں مفت علاج دی سہولت ملسی اتے اسلام آباد، آزاد کشمیر اتے گلگت بلتستان دے 70 ہسپتال ایں پروگرام اچ شامل ہین۔ چیف ایگزیکٹو آفیسر محمد ارشد قائم خانی ݙسایا جو 600 توں ودھ ہسپتالاں اچ کیش لیس علاج دی سہولت ملسی اتے شناختی کارڈ یا ٻالاں دے “ب” فارم کوں صحت کارڈ دے طور تے استعمال کیتا ونڄ سڳسی۔