ادب معاشرے دی فکری اتے اخلاقی سمت طے کرݨ اچ وݙا کلیدی کردار ادا کریندے، اورنگزیب خان کھچی

اسلام آباد۔ 16 جنوری(اے پی پی) وفاقی وزیر برائے قومی ورثہ و ثقافت ڈویژن اورنگزیب خان کھچی ملک بھر دیاں ادبی تنظیماں کوں مکمل تعاون دی یقین دہانی کرویندے آکھیے جو ادب معاشرے دی فکری اتے اخلاقی سمت طے کرݨ اچ کلیدی کردار ادا کریندے۔ انھاں اے ڳالھ “پاکستان اکیڈمی آف لیٹرز” اچ نینگراں لکھاریاں کیتے ݙاہ ݙینہوار رہائشی پروگرام دی افتتاحی تقریب نال خطاب کریندے اچ آکھی۔ وفاقی وزیر آکھیا جو لکھاری قوم کوں صحیح رستہ ݙکھاوݨ اچ اہم کردار ادا کریندن۔ ایں موقع تے اکیڈمی آف لیٹرز دی چیئرپرسن ڈاکٹر نجیبہ عارف جنوبی پنجاب توں مزید لکھاریاں کوں سامݨے گھن آوݨ تے انھاں دی حوصلہ افزائی تے زور ݙتا۔ انھاں ݙسایا جو لکھاریاں دے اعزازیے کوں 25 ہزار روپے تئیں ودھاوݨ کیتے سمری وزیراعظم آفس کوں بھیج ݙتی ڳئی اے۔ تقریب نال سیکرٹری ثقافت اسد رحمان گیلانی اتے معروف شاعر افتخار عارف وی خطاب کیتا۔ اے پروگرام 15 توں 24 جنوری 2026 تئیں جاری رہسی جیندے اچ چارے صوبیاں دے 20 نینگراں لکھاریاں کوں تربیت ݙتی ویندی پئی اے۔