مظفرگڑھ: ہک مہینے اچ ہکی وستی دے 9 چھوٹے ٻالاں دی موتاں، ڈپٹی کمشنر دا نوٹس

مظفرگڑھ۔ 19 جنوری (اے پی پی) ہک مہینے اچ ہکی وستی دے 9 چھوٹے ٻالاں دی موتاں تھئن، 11 دی حالت تشویشناک اے۔ ڈی سی مظفرگڑھ نوٹس گھن گھدے۔ ڈپٹی کمشنر دے احکامات دے بعد محکمہ صحت دی ٹیماں متاثرہ علاقے اچ پڄ ڳئن۔ محکمہ صحت دے ذرائع دے مطابق مظفرگڑھ دے نواحی موضع دین پور اچ پیرجہانیاں دے نیڑے وستی پل پیر اصحاب اچ بیماری گزشتہ صرف ہک مہینے اچ 9 ڳھٹ عمر ٻالاں دی قیمتی جاناں گھن گھدیاں۔ مرݨ آلے ٻالاں دی عمراں ڈیݙھ سال توں 6 سال دے درمیان ہن۔ اہل علاقہ دے مطابق جنھاں ٻالاں دی ہلاکتاں تھئن انھاں دے منہ تے سوڄ  تھئی، تیز بخار تھیا اتے ہک توں ݙو ݙینہہ اچ ہلاکتاں شروع تھی ڳئی۔ مرݨ آلے 9 ٻالاں اچ 6 سالہ دلشان ولد رفیق، 4 سالہ صغیر ولد صدیق، 3 سالہ انعم دختر ناصر، ڈیݙھ سالہ ریحان ولد ناظم حسین، 6 سالہ زین علی ولد صادق حسین، 4 سالہ ناجد علی ولد افضل حسین، 3 سالہ ساجدہ مائی دختر فیاض حسین، 2 سالہ ثقلین ولد حسنین تے ڈیڑھ سالہ افشاں ولد کاشف حسین شامل ہن۔ ترائے  ٻالاں ریحان، زین علی تے ناجد علی دی ہلاکتاں گزریل ترائے ݙینہ دے اندر تھئی جئیں پاروں معاملے دی سنگینی دا شدت نال احساس تھیا۔ ڈپٹی کمشنر مظفرگڑھ عثمان طاہر جپہ فوری طور تے محکمہ صحت دی ٹیماں کوں متاثرہ علاقے اچ روانہ کرݨ دے احکامات جاری کیتے۔ ڈپٹی کمشنر دے احکامات دے بعد ڈپٹی ڈسٹرکٹ ہیلتھ آفیسر ڈاکٹر اسد دی سربراہی اچ محکمہ صحت تے ڈی ایچ کیو ہسپتال مظفرگڑھ دی ٹیماں موقع تے پڄ ڳئن۔ محکمہ صحت دی ٹیماں نہ صرف فوت تھیوݨ آلے ٻالاں دا ریکارڈ تے انھاں دی بیماری دے حوالے نال تفصیل کٹھی کیتی، بلکہ علاقے اچ انجاݨی بیماری اچ مبتلا ٻالاں کوں وی فوری طور تے ابتدائی طبی امداد فراہم کر تے 11 شدید بیمار ٻالاں کوں ڈی ایچ کیو ہسپتال مظفرگڑھ منتقل کر ݙتا۔ باقی بیمار ٻالاں کوں وستی اچ ای طبی امداد ݙتی ویندی پئی اے۔ محکمہ صحت دے ذرائع دے مطابق وستی اچ “نمونیا وائرل” پاروں زیادہ ہلاکتاں تھئن اتے ٻئے بیمار ٻالاں اچ وی نمونیا دی تشخیص تھئی اے۔