کرک: گھریلو جھیڑے تے ہکے خاندان دے 7 بندے قتل، ملزم گرفتار

پشاور۔ 19 جنوری (اے پی پی) کرک دے علاقے صابر آباد اچ ہک بندے گھریلو جھیڑے پاروں آپݨے ٹٻر دے لوکاں تے اندھا دھند فائرنگ کر تے تریمتاں تے چھوٹے ٻالاں سمیت 7 بندیاں کوں قتل کر ݙتے ۔ ڈی پی او کرک دے مطابق ملزم کوں گرفتار کر گھدا ڳئے اتے تفتیش جاری اے۔ پولیس دے مطابق مقتولین اچ ملزم دی ݙو دھیاں، بھیݨ، ݙو بھرا تے انھاں دی ݙو بیویاں شامل ہن۔ واقعے دی اطلاع ملدیں ای پولیس دی بھاری نفری تے ریسکیو ٹیماں موقع تے پہنچ ڳئیں اتے لاشاں کوں پوسٹ مارٹم کیتے ہسپتال منتقل کر ݙتا۔ مقتولین اچ 50 سالہ ظفر اللہ، 48 سالہ خورشید، ݙو تریمتاں، ہک 6 سالہ ٻالڑی اتے ہک 3 مہینے دی شیر خوار ٻالڑی شامل ہن۔ ملزم فاروق عرف فاروقے کارروائی دے دوران پولیس تے وی فائرنگ کیتی، پر پولیس اونکوں گرفتار کر گھدا۔