پاکستان دی معیشت استحکام اتے ترقی دی راہ تے ٹردی پئی اے، وزیر خزانہ محمد اورنگزیب دی سعودی ہم منصب نال ڳالھ مہاڑ

ڈیووس۔ 19 جنوری (اے پی پی)وفاقی وزیر خزانہ و محصولات سینیٹر محمد اورنگزیب آکھیے جو پاکستان دی معیشت استحکام اتے ترقی دی راہ تے ٹردی پئی اے، زرمبادلہ دے ذخائر اچ بہتری آئی اے، حکومتی اقدامات نال حساباتِ جاریہ دے کھاتیاں اچ استحکام اتے پائیدار معاشی ترقی اچ مدد ملی اے۔ انہاں اے ڳالھ ڈیووس اچ ورلڈ اکنامک فورم دے سالانہ اجلاس 2026 دے موقع تے مملکتِ سعودی عرب دے وزیر خزانہ محمد الجدعان نال ملاقات اچ آکھی۔ ݙوطرفہ ملاقات اچ ݙوہاں رہنماواں پاکستان دی معاشی پیشرفت تے الایا اتے پاکستان اتے سعودی عرب وچال دیرینہ اقتصادی شراکت داری کوں ٻیا مضبوط بݨاوݨ دے امکانات تے وی الایا۔ ملاقات اچ سعودی وزیر خزانہ محمد الجدعان پاکستان اچ حالیہ معاشی بہتری تے اطمینان کیتے۔ وفاقی وزیر خزانہ سینیٹر محمد اورنگزیب ݙوہاں برادر ملکاں وچال مضبوط اتے دیرینہ تعلقات کوں اڳونہا کریندے اپݨے سعودی ہم منصب کوں اہم معاشی اشاریاں دا ݙسایا جو پاکستان دی معیشت استحکام اتے ترقی دی راہ تے ٹردی پئی اے، زرمبادلہ دے ذخائر اچ بہتری آئی اے، برآمدات کیتے تقریباً ترائے مہینے دا کور موجود اے جیہڑا معاشی استحکام دی عکاسی کریندے۔ وزیر خزانہ ݙسایا جو ایں ویلھے 16 آئی پی اوز زیرِ غور ہن ڄفاں جو پچھلے سال کامیابی نال 9 آئی پی اوز مکمل کیتے ڳئے۔ انھاں اے وی ݙسایا جو کیپٹل مارکیٹ اچ ہک لکھ 20 ہزار توں ودھ نویں سرمایہ کار شامل تھئن جیہڑا معیشت تے اعتماد دی واضح علامت اے۔ انھاں آکھیا جو شرحِ سود اچ کمی دا رجحان شروع تھی چکیے ڄݙاں جو مانیٹری پالیسی دے فیصلے سٹیٹ بینک آف پاکستان دی خودمختاری دے تحت کیتے ویندن۔ وزیر خزانہ ݙسایا جو گزشتہ سال معاشی شرحِ نمو 3.1 فیصد رہی ڄݙاں جو اڄوکے مالی سال دی پہلی سہ ماہی اچ اے ودھ تے 3.7 فیصد تھی ڳئی اے، حکومت دی توجہ حساباتِ جاریہ دے کھاتیاں دے استحکام اتے پائیدار معاشی ترقی تے ہے، توقع اے جو ترسیلاتِ زر پچھلے سال 38 ارب ڈالر توں ودھ ہن اتے ایں سال 41 ارب ڈالر توں ودھ تھیسن۔ وزیر خزانہ غیر ملکی سرمایہ کاری دے فروغ بارے آکھیا جو معدنیات، زراعت اتے ٻئے پیداواری شعبے سرمایہ کاری کیتے اہم ترجیح ہین جیہڑے برآمدات ودھاوݨ اتے مقامی آبادی کیتے روزگار دے مواقع پیدا کر سڳدن۔ انھاں نجکاری دے حوالے نال حکومتی حکمتِ عملی دا ݙسایا۔ انہاں آکھیا جو نجکاری کمیشن تجربہ کار ماہرین دی قیادت اچ کم کریندا پئے اتے ایں عمل کوں شفاف، منظم اتے پائیدار بݨایا ویندا پئے۔ سعودی وزیر خزانہ محمد الجدعان سعودی عرب دے نجکاری دے تجربے دا ݙسیندے آکھیا جو مربوط اتے مسلسل اصلاحات نال مملکت طویل المدتی فائدے حاصل کیتے۔ انھاں سعودی ہوائی اڈیاں دی مثال ݙتی جیہڑے اصلاحات دے بعد منافع بخش ادارے بݨ چکین۔