سیاسی مسائل اتے نظام اچ موجود خامیاں دا حل صرف پارلیمنٹ اتے سیاسی مکالمے نال ہی ممکن اے، رانا ثناء اللہ

اسلام آباد۔ 20 جنوری(اے پی پی) وزیراعظم دے مشیر برائے سیاسی امور سینیٹر رانا ثناء اللہ آکھیے جو پاکستان اچ سیاسی مسائل، انتخابی جھیڑے اتے نظام دیاں خامیاں صرف پارلیمنٹ اتے سیاسی مکالمے نال ہی حل تھی سڳدن، سیاستداناں کوں چاہیدے جو ہک ٻئے تے الزام لاوݨ دے بجائے مل ٻہہ تے انتخابی نظام کوں بہتر بݨاوݨ کیتے سنجیدہ ڳالھ مہاڑ کرن۔ سینیٹ اجلاس نال خطاب کریندے ہوئیں انھاں آکھیا جو ملک دے تقریباً ہر الیکشن تے اعتراضات تھیندن، جیندے نال ثابت تھیندے جو اساݙا انتخابی نظام مکمل بھروسے دے قابل کائنی۔ انھاں آکھیا جو احتجاج، دھرنے اتے محاذ آرائی مسئلیاں دا حل کائنی، وزیراعظم شہباز شریف کئی واری اپوزیشن کوں بغیر شرط مذاکرات دی دعوت ݙتی اے۔ رانا ثناء اللہ زور ݙتا جیکر ملک کوں اڳوں ودھاوݨے تاں سیاسی قیادت کوں ٻہہ تے انتخابی قوانین، الیکشن کمیشن اتے جمہوری نظام دی بہتری تے ڳالھ کرݨی پوسی۔ انھاں آکھیا جو سارے مالی اتے انتظامی مسئلیاں دا حل پارلیمنٹ وچوں ہی نکلسی۔