پاکستان چار سال بعد عالمی بانڈ مارکیٹ اچ ولݨ کوں تیار اے، اصلاحات سانڳے جڑیا رہݨا ہوسی، وزیر خزانہ محمد اورنگزیب دا بلوم برگ کوں انٹرویو

اسلام آباد۔ 20 جنوری(اے پی پی) وفاقی وزیر خزانہ و محصولات محمد اورنگزیب آکھیے جو پاکستان چار سال بعد عالمی بانڈ مارکیٹ اچ ولݨ کوں تیار اے، اصلاحات سانڳے جڑیا رہݨا ہوسی کیوں جو ایہو پائیدار ترقی دا ہکّو رستہ اے۔ اے ڳالھ انھاں بلوم برگ کوں انٹرویو ݙیندے ہوئیں آکھی۔ وزیر خزانہ آکھیا جو حکومت آندے کڄھ ہفتیاں اچ مالی مشیراں دے انتخاب کیتے تجویز جاری کریسی، حکومت جائزہ ڳھندی پئی اے جو ڈالر، یورو یا اسلامی سکوک بانڈ جاری کیتا ونڄے، ایندے نال نال پاکستان پہلی واری “پانڈا بانڈ” وی متعارف کراوݨ دی تیاری کریندا پئے۔ وزیر خزانہ آکھیا جو پاکستان معاشی استحکام دے میدان اچ اہم کامیابیاں حاصل کیتن، مہنگائی، شرح سود، مالی خسارہ اتے کرنٹ اکاؤنٹ سودھا سارے معاشی اشاریے بہتر تھیندے پئن۔ انھاں آکھیا جو زرمبادلہ دے ذخائر جون تئیں ترائے مہینیاں دی درآمدات دے برابر تھی ویسن۔ روپے تے فوری دٻائو کائنی کیوں جو ادائیگیاں دا توازن بہتر تھئے، پردیس توں آوݨ والے پیسے (ترسیلات زر) ودھ ڳن اتے روپیہ پچھلے ݙیݙھ سال توں مستحکم اے۔ انھاں ݙسایا جو سرکاری اداریاں دی نجکاری اتے ٹیکس نیٹ کوں ودھاوݨ تے کم تھیندا پئے۔ قومی ایئر لائن (PIA) پچھلے مہینے ویچ ݙتی ڳئی اے ہݨ حکومت نیویارک دے روزویلٹ ہوٹل اچ اپݨا حصہ ویچݨ سودھا وݙے ہوائی اݙیاں دے انتظامات آؤٹ سورس کرݨ اتے ٻئے ݙو درجن اداریاں دی نجکاری تے غور کریندی پئی اے۔ انھاں واضح کیتا جو اساݙی ترجیح برآمدات تے مبنی ترقی اے۔ ایندے نال بلوم برگ اپݨے تبصرے اچ آکھیے جو پاکستان دی بانڈ مارکیٹ اچ واپسی نال ݙسدے جو معیشت مستحکم تھی ڳئی اے، جݙاں جو کڄھ سال پہلے پاکستان ڈیفالٹ دے نیڑے ہئی۔ ڈیووس اچ ورلڈ اکنامک فورم دے موقع اتے وزیراعظم شہباز شریف دی قیادت اچ وفد عالمی سرمایہ کاراں کوں اے سنیہا ݙیندا پئے جو پاکستان سرمایہ کاری کیتے تیار اے۔