فن لوک گائیکی دی سنڄاݨ ثریا ملتانیکر کوں زبردست خراج تحسین، حکومت پنجاب گھر دے ٻاھرو “تختی لوح، اعزاز” لا ݙتی

ملتان۔ 20 جنوری(اے پی پی)لوک موسیقی اچ پورے جیوݨ دی شاندار خدمات کوں منیندے ہوئے پنجاب حکومت ولوں سرائیکی گائیکی دی سنڄاݨ ثریا ملتانیکر دے گھر دے ٻاھرو “تختی لوح، اعزاز” لا ݙتی ڳئی اے۔ ملتان دی دھرتی توں ہووݨ پاروں انہاں دا ناں ثریا توں ثریا ملتانیکر پیا اتے انہاں کوں کلاسیکل، فوک، غزل، کافیاں اتے لوک ڳاوݨ اچ سند منیا ویندے اتے ایں میدان فن اچ انہاں 70 سال ڳنݙھا ݙتن۔ 1956 اچ او ریڈیو پاکستان لاہور توں گائیکی نال جڑین اتے کئی منیاں ہویاں کلاسیکل، کافیاں، غزلاں اتے لوک ڳاوݨ ڳائن۔ 1966 اچ اردو فلم بدنال دے ڳاوݨ “بڑے بے مروت ہیں یہ حسن والے” توں انہاں کوں ہکی رات شہرت دی انت تے پچا ݙتا۔ انہاں دی فنی خدمات کوں خراج تحسین پیش کرݨ کیتے کمشنر ملتان عامر کریم خان ثریا ملتانیکر دے گھر دے ٻاھرو “تختی لوح، اعزاز” لا ݙتی اتے تختی دی رونمائی توں بعد دعا کرائی۔ این موقع تے ثریا ملتانیکر وی موجود ہن۔ او 1970 اچ ملتان اچ ریڈیو پاکستان دا سنتر قائم تھیوݨ تے اپݨی ڄمݨ ڄاہ ول آئن اتے ملتان کوں مرکز فن ٻݨائے جیڑھا اڄ تئیں جاری و ساری اے۔