انڈر 19 ورلڈ کپ: پاکستان زمبابوے کوں ہرا تے سپر 6 مرحلے اچ پڄ ڳئے

ہرارے۔ 22 جنوری(اے پی پی)آئی سی سی انڈر 19 ورلڈ کپ دے 19 ویں میچ اچ پاکستان زمبابوے کوں 8 وکٹاں نال ہرا تے سپر 6 مرحلے کیتے کوالیفائی کر گھدے۔ پاکستان انڈر 19 کرکٹ ٹیم 129 رنز دا ہدف 26.2 اوورز اچ 2 وکٹاں دے نقصان تے پورا کیتے۔ سمیر منہاس 74 اتے احمد حسین 24 رنز نال ناٹ آؤٹ رہین جݙاں جو عثمان خان 26 اتے علی حسن بلوچ 3 رنز ٻݨائن۔ ایندے توں پہلے ہرارے اچ کھیݙے ڳئے میچ اچ پاکستان ٹاس جِت تے پہلے زمبابوے کوں بیٹنگ دی دعوت ݙتی، زمبابوے دی ٹیم پہلے کھیݙدے ہوئیں 35 اوورز اچ 128 رنز ٻݨا تے آؤٹ تھی ڳئی۔ زمبابوے دے نتھینیل ہلابانگانا 59 اتے برانڈن سینزیرے 15 رنز بݨائے۔ پاکستان ولوں علی رضا 3، محمد صیام، عبدالسبحان اتے مومن قمر ݙو ݙو کھلاڑیاں کوں آؤٹ کیتا جݙاں جو احمد حسین ہک وکٹ ڳھدی۔