سٹیٹ بینک دا پالیسی ریٹ کوں 10.5 فیصد تے برقرار رکھݨ دا فیصلہ، عمومی مہنگائی دسمبر 2025ء وچ سالانہ بنیاداں تے 5.6 فیصد رہی، مالی سال 26 وچ حقیقی جی ڈی پی نمو 3.75 توں 4.75 فیصد دی حد وچ رہݨ دا تخمینہ

اسلام آباد۔ 26 جنوری (اے پی پی) سٹیٹ بینک دی زری پالیسی کمیٹی پالیسی ریٹ کوں 10.5 فیصد تے برقرار رکھݨ دا فیصلہ کیتے۔ زری پالیسی کمیٹی دے اجلاس دے بعد جاری بیان دے مطابق، وݙے پیمانے دی صنعت سازی سودھا حالیہ اشاریاں توں ظاہر تھیندے جو معاشی سرگرمیاں توقع توں ودھ تیزی نال ودھدیاں پئن جیندے اچ مقامی شعبیاں دا بنیادی کردار اے۔ کمیٹی محسوس کیتا جو درآمدات اچ اضافے اتے برآمدات اچ کمی پاروں تجارتی خسارہ ودھیا، سمندر پار پاکستانیاں دی بھیجی ہوئی رقم (ترسیلات) اتے عالمی منڈی اچ قیمتاں سازگار رہݨ پاروں کرنٹ اکاؤنٹ خسارہ قابو اچ رہے۔ ایں تجزیے دی بنیاد تے کمیٹی دی رائے اے جو موجودہ پالیسی ریٹ کوں برقرار رکھیا ونڄے تاں جو قیمتاں دا استحکام اتے پائیدار معاشی نمو یقینی تھیوے۔ بیان دے مطابق مالی سال 26ء دی پہلی سہ ماہی اچ حقیقی جی ڈی پی اچ 3.7 فیصد دی نمو رپورٹ تھئی جیندے اچ صنعت اتے زراعت دا وݙا ہتھ اے۔ صارفین اتے کاروباری اداریاں دا اعتماد ودھیے جݙاں جو مہنگائی بارے انھاں دی توقعات گھٹ تھئین۔ سٹیٹ بینک دے زرِ مبادلہ دے ذخائر 16 جنوری تئیں 16.1 ارب ڈالر تئیں پڄ ڳئن۔ آئی ایم ایف وی 2026ء کیتے عالمی معاشی نمو دی پیش گوئی اچ کڄھ اضافہ کر ݙتے۔ کمیٹی آکھیا جو برآمدات ودھاوݨ اتے پائیدار ترقی کیتے ساختی اصلاحات ٻہوں ضروری ہن، خاص طور تے ٹیکس نیٹ ودھاوݨ اتے گھاٹے اچ چلݨ آلے سرکاری اداریاں دی نجکاری دے ذریعے۔ نجی شعبے دے قرضیاں اچ وی 578 ارب روپے دا اضافہ تھئے۔ سٹیٹ بینک بینکاں کیتے نقد محفوظ رکھݨ دی حد (CRR) وی 6 فیصد توں گھٹ کر تے 5 فیصد کر ݙتی اے تاں جو نجی شعبے کوں مزید قرضے مل سڳن۔ کمیٹی دا تخمینہ اے جو آوݨ والے کجھ مہینیاں اچ مہنگائی عارضی طور تے ہدف توں ودھ سڳدی اے ٻھل مالی سال 26 اتے 27 اچ اے 5 توں 7 فیصد دے ہدف اچ ول آسی۔