مظفرڳڑھ، تیز رفتار ٹرالر ݙو موٹر سائیکلاں تے سوار ٻالاں کوں کچل ݙتا، بھݨ بھرا سمیت 5 طالب علم جاں بحق، ریسکیو ذرائع

مظفرڳڑھ۔ 29 جنوری (اے پی پی) چوک سرور شہید اچ اندوہناک ٹریفک حادثے اچ تیز رفتار ٹرالر ݙو موٹر سائیکل سواراں کوں کچل ݙتا، بھݨ بھرا سمیت 5 طالب علم جاں بحق تھی ڳئن۔ ریسکیو ذرائع دے مطابق کوٹ ادو دی تحصیل چوک سرور شہید اچ ایم ایم روڈ تے مان پمپ دے سامݨے ہک تیز رفتار ٹرالر 2 موٹر سائیکلاں تے سوار 5 طالب علماں کوں کچل ݙتا، موٹر سائیکلاں تے سوار پنجے ٻال جاں بحق تھی ڳئن۔ اے ٻال فاران اکیڈمی تے سپیریئر کالج چوک سرور شہید دے طالب علم ہن۔ جاں بحق ٻالاں اچ عبداللہ ولد زاہد اقبال (19 سال)، عبدالرحمن ولد زاہد اقبال (6 سال)، محمد عادل ولد محمد عارف (15 سال)، باسط ولد محمد صدیق (17 سال) تے دعا فاطمہ دختر محمد صدیق (9 سال) شامل ہن۔ اطلاع ملدے ای ریسکیو 1122 دی ٹیم موقع تے پڄ تے لاشاں کوں ٹی ایچ کیو ہسپتال چوک سرور شہید منتقل کر ݙتے۔ باسط تے دعا فاطمہ آپس اچ سڳے بھیݨ بھرا ہن۔ حادثہ ٻالاں دے سکول توں واپس گھراں کوں ویندیں ہوئیں پیش آئے، تمام ٻالاں دا تعلق چک نمبر 560 چوک سرور شہید نال اے۔