بینکاں تے انحصار گھٹ کرݨ تے انشورنس شعبے کوں ودھاوݨ دی لوڑھ اے: وزیرِ خزانہ

اسلام آباد۔ 30 جنوری(اے پی پی)وفاقی وزیرِ خزانہ سینیٹر محمد اورنگزیب آکھیے جو فنانسنگ کیتے صرف بینکاں تے انحصار گھٹ کرݨا ہوسی، انشورنس کمپنیاں، اثاثہ جاتی مینجرز، پنشن فنڈز اتے ریٹیل سرمایہ کاراں دی شمولیت کوں ودھاوݨ دی سخت لوڑھ اے۔ اے ڳالھ انہاں ایس ای سی پی (SECP) دی نویں قیادت نال ملاقات اچ آکھی اے۔ اجلاس اچ ایس ای سی پی دے چیئرمین کبیر احمد سدھو تے کمشنر علی فرید خواجہ وی شریک ہن۔ وزیرِ خزانہ نویں قیادت دا خیر مقدم کریندے ہوئیں امید کیتی جو انہاں دا ملکی اتے عالمی مارکیٹ دا تجربہ پاکستان دے ریگولیٹری فریم ورک کوں مضبوط بݨاوݨ اچ مددگار ثابت تھیسی۔ اجلاس اچ ایں ڳالھ تے زور ݙڈتا گئے جو کیپٹل مارکیٹ کوں وسعت ݙتی ونجے تاں جو سرکاری تے نجی شعبیاں کیتے مالی وسائل دے نویں ذریعے پیدا تھی سگن۔ وزیرِ خزانہ آکھیے جو ساڈا مقصد ہک ایہو جھیاں نظام بݨاوݨ اے جیندے اچ سرمایہ کاراں دا اعتماد ودھے۔ انہاں مطابق قرضہ جاتی کیپٹل مارکیٹ دی ترقی ساݙی ترجیح اے تاں جو بینکاں دے علاوہ ڈوجھے مالیاتی ادارے وی معیشت اچ اپنا حصہ پا سگن۔ اجلاس اچ اے وی ݙسایا گیا جو سرمایہ کاری دے عمل اچ جیڑھیاں رکاوٹاں تے ودھیکی لاگت اے، او کوں گھٹ کیتا ویسی۔ اجلاس اچ ڈیجیٹل اکاؤنٹ کھولݨ دے عمل کوں تیز کرݨ تے ریٹیل سرمایہ کاراں کیتے مارکیٹ اچ داخلہ سوکھا بݨاوݨ تے وی بحث تھئی اے۔ وزیرِ خزانہ آکھیے جو ٹیکنالوجی دے استعمال نال ایں پورے نظام اچ شفافیت آسی تے کم تیکھے تھیسی۔ ایس ای سی پی دی قیادت یقین ڈیوائے جو او فنانس ڈویژن دے نال مل تے انہاں اصلاحات کوں عملی جامہ پویسن تاں جو ملک دی معیشت مستحکم تھی سگے تے سرمایہ کاری دے نویں مواقع پیدا تھی سگن۔