مہاندرے سرائیکی شاعر امان اللہ ارشد دی یاد اچ ارماݨی کٹھ

اسلام آباد۔ 7 فروری( اے پی پی) سرائیکی فورم اسلام آباد ولوں سرائیکی ادبی کمیٹی دی چیئرپرسن ڈاکٹر سعدیہ کمال، جنرل سیکرٹری شاہد دھریجہ دی اہر نال اکادمی ادبیات پاکستان اسلام آباد اچ عہد ساز سرائیکی شاعر امان ارشد دی یاد وچ مٌکاݨی کٹھ تھیا۔ میل مہاندرے انقلابی سرائیکی شاعر اتے دانشور جہانگیر مخلص، خاص مزمان ڈائریکٹر جنرل ریڈیو پاکستان سعید احمد شیخ اتے مشور شاعر، ادیب ڈاکٹر فرحت عباس اتے اعزازی مزمان سرائیکی، اردو شاعر وفا چشتی ہن۔ نظامت شاہد دھریجہ کیتی۔ کٹھ اچ شاعراں، ادیباں وسیب دے سٌڄاک شاعر امان اللہ ارشد دی حیاتی، دھرتی نال جڑت، سرائیکی ادب کیتے  عظیم خدمات اتے انہاں کوں خراج پیش کیتا ڳئے۔ میل مٌہاندرے بھاڳوند جہانگیر مخلص اپݨے من بھاوݨے سنگتی دیاں یاداں تازیاں کریندے،  ٹھڈڑا ساہ کڈھیندیں، ترمدیں ہنجوں نال اکھیا جو امان اللہ ارشد دا وچھوڑا ٻہوں مونجھا کر ڳے،انہاں دی سرائیکی ادب دا سوبھ عظیم ترکہ اے، او ݙوھڑے دا بادشاہ ہئی، انہاں دی غزل، قطعہ، گیت، نظم اتے نعت سرائیکی ادب اچ وکھرا اتے نویکلا درجہ رکھیندی اےن۔ جہانگیر مخلص آکھیا جو ارشد دی شاعری اچ دھرتی دی مٹھاس ملدی اے جیڑھی وسوں واسیں دی ترجمانی کریندی اے۔ ڈائریکٹر جنرل ریڈیو پاکستان سعیداحمد شیخ آکھیا جو امان اللہ ارشد دی شاعری ادبی تاریخ ءچ لازوال سنڄاݨ رکھیندی اے اتے آمدݨ نسلاں کیتے سوجھل راہ اے۔ ڈاکٹر فرحت عباس آکھیا جو امان اللہ ارشد دی شاعری اچ صوفیانہ رنگ ملدن، انسانی جذبیاں دا اظہار اے اتے انھاں دے عوامی لہجے اچ سڄائی نشابر اے۔ وفا چشتی آکھیا انہاں دیاں نعتاں عشق رسول دا اعلیٰ نمونہ ءن اتے انھاں دی شاعری سرائیکی دا ہمیش خاصہ رہسی۔ سبطین رضا لودھی آکھیا ارشد سئیں دی حیاتی، شاعری ءچ سادگی، خوش اخلاقی اتے وسوں واسیاں نال محبت مثالی اے۔ سلیم شہزاد آکھیا جو انہاں محبت، محنت، لگن نال سرائیکی ادب کوں نوٌیں رنگ ݙتن۔ مشور براڈ کاسٹر نذیر تبسم آکھیا جو امان اللہ ارشد سرائیکی دے ستون ہن، او مٹھے لہجے مہان شاعرہن، انہاں دا وچھوڑا سرائیکی ادب دا ٻہوں وݙا زیان اے۔ مظہر کاٹھیا آکھیا جو امان اللہ ارشد وسیب دے درداں، محرومیاں دے ترجمان ہن۔ مرید مضراب آکھیا انہاں اپݨی شاعری اچ سرائیکی تہذیب، ثقافت اتے روحانی ورثے محفوظ کیتے۔ جاوید ملک انہاں دے شاعری سںݨا اتے یاداں تازہ کیتا۔ یاسین بھٹی آکھیا جو امان اللہ ارشد دیاں ادبی خدمات ہمیش یاد رکھیا ویسن۔ تعزیتی کٹھ وچ آن لائن شریک سرائیکی عوامی تریمت تحریک دی اڳواݨ ادی نینا (نسرین گل) آکھیا عہد ساز شاعر ادا امان اللہ ارشد سرائیکی شاعری کوں روایتی ڈھٻ توں کڈھ تے جدت دے نوُیں رنگیں اچ رنگیئے، ݙوھڑے کوں عشق، مشعوقی، ہجر، فراق، دی رمز توں کڈھ تے وسوں دے محرومیں، سولیں، دردریں اتے تھیوݨ والے وانڄھ کوں نشابر کریندے انقلابی موڑ ݙے تے امر کر ݙتے. ادی نینا دا آکھݨ ہا جو بقول ادا عاشق خان بزدار ارشد دا آکھݨ

” ݙونہیں موئیوں ارشد پاݨی توں

تیکوں چھل ماریئے میکوں تریہہ ماریئے”

اے سرائیکی ݙوھڑے دا انقلابی موڑ ہئی، انہاں اپݨی شاعری نال ما دھرتی دا پورا ہورا حق ادا کیتے۔ ادی نینا آکھیا او وسیب دے نوحہ گر ہووݨ دے نال نال ٻہوں وݙے انسان دوست ہن۔ صدر سرائیکی فورم، چیئرپرسن سرائیکی ادبی اکیڈمی ڈاکٹر سعدیہ کمال آکھیا جو امان اللہ ارشد دی شاعری سرائیکی زبان اتے ادب دی اݨ کھٹ بݨیاد اے، انہاں دے فکری نظریاتی ورثے کوں سانٻھ رکھݨ ہر سرائیکی کیتے ماݨ دی ڳالھ اے۔ ڈاکٹر سعدیہ کمال آکھیا مزمانیں دا لکھ تھورا جو اڄ امان اللہ ارشد دیاں یاداں تازہ کرݨ کیتے کٹھے تھئن، اینجھے میل، کچہریاں سرائیکی ادب دے ودھارے، ثقافت کوں زندہ رکھݨ کیتے ٻہوں ضروری ہین۔ انہاں آکھیا جو امان اللہ ارشد دی شاعری دا سرائیکی ادب، زبان دی ترقی وچ وݙا کردار اے، انہاں اہݨی شاعری دے ذریعے نوٌیں نسل کوں شعور ݙتے، وسیب اتے وسوں واسیاں دا مقدمہ جڳ جہان تئیں پڄائے، او وسیب دے حقیقی ترجمان ہن، انہاں لوکاں اچ اپݨا حق منگݨ دی، اواز چاوݨ جوت جڳائی اے۔ڈاکٹر سعدیہ کمال آکھیا دی شاعری ماء دھرتی دا نوحہ اے، جیرھی آمدݨ نسلیں کیتے وی سوجھل راہ بݨسی۔ تعزیتی کٹھ وچ ہنجاب تے وفاقی حکومت توں اپیل کیتی ڳئی جو بہشتی امان اللہ ارشد دے ٻالاں کوں سرکاری ملازمتاں ݙتیاں ونڄن، اداریاں توں وی ارداس کیتی ڳئی جو انہاں دے زیر تعلم ٻالاں دے تعلیمی اخراجات کیتے مالی مدد کیتی ونڄے۔ ایں میل اچ سلیم اختر، ضیاء بلوچ، منظور علی ویسریو، فرحت فاطمہ،خدیجہ، صابر ملک، حبیب حسین، مزمل عارض، زوہیب حسن اتے ڈھیر سارے وسیب واسی شریک تھئے۔ کٹھ اچ امان اللہ ارشد دی بخشش کیتے دعا کیتی ڳئی۔

(ڈاکٹر سعدیہ کمال )