جھوک فرید چولستان اچ سرائیکی فاونڈیشن پاکستان ولوں 10ویں سالانہ سرائیکی کلچرل کانفرنس

اے پی پی۔ 7 فروری (اے پی پی) سرائیکی فاونڈیشن پاکستان ولوں 10ویں سالانہ سرائیکی کلچرل کانفرنس جھوک فرید چولستان اچ رکھی گئی جیندے اچ گلوکاراں اتے شاعراں لوکاں کوں جھمݨ تے مجبور کرݙتا۔ کانفرنس دی میزبانی چئیرمین سرائیکی فاونڈیشن پاکستان جام اظہرمراد لاڑ کیتی۔ کانفرنس اچ پاکستان سرائیکی پارٹی دے مرکزی صدر ملک اللہ نواز وینس، پاکستان سرائیکی اتحاد دے مرکزی کنوئینر سردار انور گل خان جتوئی، سرائیکی نیشنل پارٹی دے مرکزی اگواݨ احمد خان کانجو ایڈووکیٹ، جئے سرائیکی تحریک دے اگواݨ آغا عامر کورائی، سید خلیل بخاری، مظہر سعید خان گوپانگ، احمد نواز خان سومرو، جام راشد مجنوں گانگا، احسان کوری، جیون فقیر مہر، اسماعیل کٹوال ایڈووکیٹ، شبنم قادر، ریاض کھرل، جام فیض اللہ سودھا ݙوجھے مقررین خطاب کیتا اتے آکھیا جو سرائیکی صوبہ سرائیکی قوم دا آئینی حق اے، انڄھ صوبے دی منزل نیڑے اے، سرائیکی آپݨے حقوق دی بازیابی کیتے کٹھے تھی ونجے، سرائیکی قوم دا استحصال بند کیتا ونڄے۔ مقررین آکھیا جو چولستان دیاں زمیناں صرف روھیلیاں کوں ݙتیان ونڄں، روھی دے کلچر کوں محفوظ کیتا ونڄے۔ سرائیکی کلچرل کانفرنس اچ وکھو وکھ سیشن مشاعرہ، موسیقی، ایوارڈ، تعزیتی سیشن، کتاباں دی ڳھنڈ کھلائی وی تھئی۔ کانفرنس دے موقع تے اسلم رسول پوری ایوارڈ نور حسین شاہد، حمید اصغر شاہین ایوارڈ، پروفیسر پرویز قادر، منیر تاج کلچرل ایوارڈ، احسن فریدی سماجی ایوارڈ عالمگیرخان کوں ݙتے گئے۔ آسان سرائیکی ترجمہ قرآن مجید، خالدنجیب دی وطن دی دھرتی تے نذیر بزمی دی فرید دا وعظ سنو، فیاض ثمر دی پاݨی اچ پیرا کتاباں دی تقریب ڳھنڈ کھلائی وی تھئی۔ کانفرنس اچ چولستانی فنکار آڈو بھگت سودھا ݙوجھے گلوکاراں اتے شاعراں دا آپݨا کلام پیش کیتا۔ کانفرنس اچ مخدوم ارشد قریشی، جام رفیق چولستانی، اقصی چوہدری، لالہ اقبال بلوچ، شاہدرشید بھٹہ، جام سلیم سعیدی اتے ٻںیاں خطاب کیتا۔(ڈاکٹر سعدیہ کمال )