پاکستان، مصر، اردن، متحدہ عرب امارات، انڈونیشیا، ترکیہ، سعودی عرب تے قطر دے وزرائے خارجہ دی مقبوضہ مغربی کنارے دے حوالے نال اسرائیل دے غیر قانونی فیصلیاں تے اقدامات دی مذمت

اسلام آباد۔ 9 فروری (اے پی پی) پاکستان، مصر، اردن، متحدہ عرب امارات، انڈونیشیا، ترکیہ، سعودی عرب تے قطر دے وزرائے خارجہ اسرائیل دے انھاں غیر قانونی فیصلیاں تے اقدامات دی سخت ترین لفظاں اچ مذمت کیتی اے جیہڑے مقبوضہ مغربی کنارے اچ غیر قانونی اسرائیلی خودمختاری مسلط کرݨ، آباد کاری دی سرگرمیاں کوں تکڑا کرݨ تے ہک نویں قانونی تے انتظامی حقیقت نافذ کرݨ کیتے کیتے ویندے پئن۔ ترجمان دفترِ خارجہ دے مطابق انھاں ملکاں دے وزرائے خارجہ ولوں جاری مشترکہ اعلامیے اچ آکھیا گیا جو اسرائیل دے انھاں اقدامات دے نتیجے اچ مقبوضہ علاقے دے غیر قانونی الحاق دی کوششاں تے فلسطینی عوام دی جبری بے دخلی اچ تکھائی آندی پئی اے۔ اعلامیے دے مطابق وزرائے خارجہ ایں امر دا اعادہ کیتا جو اسرائیل کوں مقبوضہ فلسطینی علاقیاں تے کہیں قسم دی کوئی خودمختاری حاصل کائنی۔ وزرائے خارجہ مقبوضہ مغربی کنارے اچ اسرائیلی حکومت ولوں جاری توسیع پسندانہ پالیسیاں تے غیر قانونی اقدامات دے تسلسل توں خبردار کیتا جو خطے اچ تشدد تے تنازع کوں ٻیا ہوا ڈیندے پئن۔ وزرائے خارجہ انھاں غیر قانونی اقدامات کوں مکمل طور تے مسترد کریندیں ہوئیاں آکھیا جو اے بین الاقوامی قانون دی صریح خلاف ورزی ہن، ڈو ریاستی حل کوں نقصان ݙیوݨ اتے فلسطینی عوام دے ایں ناقابلِ تنسیخ حق تے حملہ ہن جیندے تحت او 4 جون 1967ء دی سرحداں دی بنیاد تے مقبوضہ القدس کوں دارالحکومت بݨا کراہیں آپݨی آزاد تے خودمختار ریاست قائم کرݨ دے حقدار ہن۔ ایجھے اقدامات خطے اچ امن و استحکام کیتے جاری کوششاں کوں وی کمزور کریندن۔وزرائے خارجہ ایں امر دی توثیق کیتی جو مقبوضہ مغربی کنارے اچ کیتے ون٘ڄݨ آلے اے تمام غیر قانونی اقدامات کالعدم تے باطل ہن تے اقوامِ متحدہ دی سلامتی کونسل دی قرارداداں بالخصوص قرارداد 2334 دی واضح خلاف ورزی ہن، جیہڑی 1967ء توں مقبوضہ فلسطینی علاقیاں بشمول مشرقی بیت المقدس دی آبادیاتی ساخت، کردار تے حیثیت اچ تبدیلی کیتے کیتے گئے تمام اسرائیلی اقدامات دی مذمت کریندی اے۔ وزرائے خارجہ عالمی برادری توں آپݨے مطالبے دا اعادہ کیتا جو او آپݨی قانونی تے اخلاقی ذمہ داریاں پوریاں کرے اتے اسرائیل کوں مقبوضہ مغربی کنارے اچ خطرناک کشیدگی اچ اضافے تے اوندے حکام دے اشتعال انگیز بیانات کوں فوری طور تے روکݨ تے مجبور کرے۔ انھاں ایں گالھ تے زور ڈتا جو فلسطینی عوام دے حقِ خود ارادیت تے ریاستی حیثیت دے جائز حقوق دی تکمیل، بین الاقوامی قانونی قرارداداں تے عرب امن اقدام دے مطابق ݙو ریاستی حل دی بنیاد تے منصفانہ تے جامع امن دے قیام دا واحد رستہ اے جو خطے اچ پائیدار امن، سلامتی تے استحکام کوں یقینی بݨا سگدے۔