وفاقی وزیرِ خزانہ دی بین الاقوامی سرمایہ کاراں دے وفد نال ملاقات

اسلام آباد۔ 11 فروری(اے پی پی) وفاقی وزیرِ خزانہ و محصولات سینیٹر محمد اورنگزیب آکھیے جو حکومت ساریاں ادائیگیاں ویلھے تے چنڳے طریقے نال کریندی پئی اے اتے منظور شدہ پروگراماں دے تحت بین الاقوامی منڈیاں تئیں رسائی دے امکانات ڳولیندے پئے ہیں جیندے اچ پہلا “پانڈا بانڈ” اتے “گلوبل میڈیم ٹرم نوٹ فریم ورک” شامل ہن۔ انھاں اے ڳالھ اسلام آباد اچ بین الاقوامی سرمایہ کاراں دے ہک اعلیٰ سطح وفد نال ملیݨ ویلھے آکھی۔ وفد اچ انٹرنیشنل فنانس کارپوریشن، برٹش انٹرنیشنل انویسٹمنٹ، ایشیائی ترقیاتی بینک اتے بالتورو کیپٹل دے نمائندے شامل ہن۔ ملاقات اچ نجی شعبے دی قیادت اچ ترقی دے ودھارے، سرمایہ کاری دے حصول اتے پاکستان دے اصلاحاتی ایجنڈے دی حمایت اچ تعاون تکڑا کرݨ تے توجہ ݙتی گئی۔ وزیرِ خزانہ انٹرنیشنل فنانس کارپوریشن، برٹش انٹرنیشنل انویسٹمنٹ اتے ایشیائی ترقیاتی بینک دا پاکستان دے نجی شعبے دی مالی مدد اتے مقامی کرنسی اچ سرمایہ کاری دے اقدامات تے خیر مقدم کیتا۔ مذاکرات اچ نجی شعبے دے سرمائے کوں تحفظ ݙیوݨ اتے ایندے اچ توسیع، خودمختار خطرات اچ کمی اتے جدید مقامی کرنسی فنانسنگ دے طریقے نال نجی شعبے دی شرکت ودھاوݨ دی اہمیت تے زور ݙتا گیا۔ وزیرِ خزانہ وفد کوں پاکستان دے جاری تجارتی آزادیاں دے پروگرام دا ݙسایا، جیندے اچ ٹیرف کوں معقول بݨاوݨ شامل اے، ایں اصلاحاتی رستے دا مقصد پاکستان کوں جنوب مشرقی ایشیائی معیشتاں وانگوں ترقی دی راہ تے پاوݨ اے۔ مذاکرات اچ توانائی دے شعبے دی اصلاحات، ٹیکس پالیسی اچ بہتری اتے ٹیکس انتظامیہ دی کارکردگی ودھاوݨ دے اقدامات تے وی ڳالھ مہاڑ تھئی۔ وزیرِ خزانہ ٹیکس نیٹ کوں وسیع کرݨ تے ٹیکس پالیسی کوں ترقیاتی اہداف دے مطابق بݨاوݨ دے حکومتی عزم دا اعادہ کیتا جو مقامی سرمایہ کاراں دے اعتماد کوں مضبوط بݨاوݨ حکومت دی پہلی ترجیح اے۔ بین الاقوامی اداریاں دے نمائندیاں اتفاق کیتا جو ترقیاتی شراکت دار ہݨ تیزی نال نجی شعبے دی شرکت، تجارت دے ودھارے اتے بنیادی ڈھانچے، چھوٹے و درمیانے درجے دے کاروباراں (SMEs) اچ سرمایہ کاری کوں سہولت ݙیوݨ تے توجہ ڈیندے پئن۔ فریقین شراکت داری ٻئی مضبوط ٻݨاوݨ اتے پاکستان کیتے سرمایہ کاری دوست ماڈل دو پیش رفت کوں تیز کرݨ تے اتفاق کیتا۔