پاکستان اتے امریکہ دا اقتصادی تعاون ٻیا مستحکم کرݨ کیتے قریبی رابطیاں تے اتفاق

اسلام آباد۔ 11 فروری(اے پی پی) وفاقی وزیرِ خزانہ و محصولات سینیٹر محمد اورنگزیب نال امریکہ دے محکمہ خارجہ دے بیورو برائے جنوبی و وسط ایشیائی امور دے نائب معاون وزیرِ خارجہ جان مارک پومرشیم اتے پاکستان اچ امریکی ناظم الامور نیتالی اے بیکر ملین۔ فریقاں پاکستان دی معاشی صورتحال، اصلاحات دے ایجنڈے اتے ݙوطرفہ معاشی تعاون ودھاوݨ دے موقعیاں تے الایا۔ وزیرِ خزانہ وفد کوں پاکستان اچ معاشی اصلاحات اتے اقتصادی ومالیاتی استحکام سانڳے اقدامات دا ݙسایا۔ امریکی نائب معاون وزیرِ خارجہ معاشی اشاریاں اچ بہتری دا خیر مقدم کیتا اتے آکھیا جو امریکہ ہک مستحکم پاکستان کوں قدر نال ݙیھدے، امریکی کاروباری ادارے پاکستان اچ اصلاحات دا جائزہ ڳھندے پئن۔ فریقین پاکستان اتے امریکہ وچال اقتصادی تعاون ٻیا مستحکم کرݨ کیتے قریبی رابطیاں کوں ودھاوݨ تے اتفاق کیتے۔