وزیر خزانہ محمد اورنگزیب دی برٹش امریکن ٹوبیکو دے وفد نال ملاقات

اسلام آباد۔12 فروری (اے پی پی)وفاقی وزیر خزانہ و محصولات سینیٹر محمد اورنگزیب آکھیے جو وزیراعظم دی قیادت اچ جاری پاکستان دا ڈھانچہ جاتی اصلاحات دا ایجنڈا ماضی دے تیزی و تنزلی دے چکراں کوں تروڑݨ کیتے ٻݨایا ڳئے۔ انہاں اے ڳالھ اسلام آباد برٹش امریکن ٹوبیکو دے وفد نال ملاقات اچ آکھی۔ وفد دی قیادت ریجنل ڈائریکٹر پاسکال مولی میسٹر کریندے پئے ہن۔ وفد اچ برٹش امریکن ٹوبیکو اتے پاکستان ٹوبیکو کمپنی دے سینئر ایگزیکٹو ممبر وی شامل ہن۔ وزیر خزانہ آکھیے جو پاکستان دے ڈھانچہ جاتی اصلاحات دے ایجنڈے دی بنیاد مالیاتی نظم و ضبط، ٹیکس نیٹ دی توسیع اتے نفاذ و تعمیل دے مضبوط نظام تے مشتمل اے، مالیاتی پائیداری کیتے منصفانہ ٹیکس نظام، ساریاں شعبیاں اچ بہتر تعمیل اتے غیر قانونی سرگرمیاں کوں روکݨ کیتے فیصلہ کن اقدامات ضروری ہن۔ انہاں آکھیے جو افراد، طریقے اتے ٹیکنالوجی تے مبنی اصلاحات نال حکومت دی ٹیکس تبدیلی مہم نفاذ دے نظام کوں ٻیا بہتر ٻݨائے جیندے اچ مصنوعی ذہانت (AI) نال چلݨ والے سسٹم اتے ٹریک اینڈ ٹریس اقدامات شامل ہن۔ انہاں ݙسایا جو چینی، سیمنٹ، تمباکو، ٹیکسٹائل اتے مشروبات سودھا مختلف شعبیاں اچ سخت اقدامات پاروں محصولات دی وصولی اچ بہتری آئی اے۔ وفد کوں غیر قانونی سگریٹ سازی تے سمگلنگ دے خلاف جاری کارروائیاں تے وی بریفنگ ݙتی گئی۔ وفد حکومت دے اقدامات دی تعریف کریندے ایکسائز ڈیوٹی اچ استحکام اتے غیر قانونی مصنوعات پاروں قیمت دے فرق تے چنتا ݙکھایا۔ وزیر خزانہ آکھیے جو شعبہ جاتی جائزے جاری ہن تاں جو پالیسی اقدامات دا تجزیہ کیتا ونڄ سڳے، مالیاتی استحکام کیتے محصولات اچ اضافہ ضروری اے ٻھل حکومت تعمیری مکالمے کیتے تیار اے۔ فریقین نفاذ اتے ٹیکسیشن دے معاملیاں تے رابطہ جاری رکھݨ تے اتفاق کیتا۔