راجن پور، کچہ آپریشن اچ 357 مجرماں سرنڈر کر ݙتے، ڈی پی او

راجن پور۔ نمائندہ۔ 24 فروری (اے پی پی) راجن پور دے کچہ ایریا اچ دہشت تے وحشت دی علامت عمرانی، سکھانی، لنڈ، اندھڑ گینگز تے کچہ کراچی اچ پولیس دا ڈاکوواں دے خلاف آپریشن جاری اے۔ ڈاکوواں دے ٹکاݨیاں تے ڈرون نال گولا باری کیتی ڳئی اے۔ ڈی پی او راجن پور محمد عمران “اے پی پی” کوں ݙسایا جو آپریشن اچ مرݨ دے ڈر توں انتہائی مطلوب گینگز دے 2 ٻئے ڈاکو امین لنڈ (جیندے سر دی قیمت 60 لکھ اے) اتے محمد الیاس لنڈ پولیس دے سامݨے سرنڈر کر ݙتے ۔ گرفتار ڈاکو اغوا، قتل تے ڈکیتی دے درجناں مقدمیاں اچ مطلوب ہن ۔ سرنڈر تھیوݨ آلے ڈاکواں دی تعداد ہݨ تئیں 357 تھی ڳئی اے ، گرفتار ڈاکواں کوں قانون دے مطابق سزا ݙتی ویسی ۔ انھاں ڈسایا اے جو ڈاکواں دے 41 ٹکاݨیاں تے بنکرز کوں تباہ کر ݙتا ڳئے۔ ٻئے ڈاکواں کوں پولیس ولوں اعلان کیتا ویندا پئے جو او گرفتاری ݙے ݙیون، نہیں تاں ہلاک تھی ویسن ۔