پورے ملک سودھے سرائیکی وسیب اچ “سرائیکی ثقافتی ݙینھ “جوش تے جذبے نال منایا ویندا پئے

اسلام آباد۔6مارچ (اے پی پی سرائیکی نیوز سروس) پورے ملک سودھے سرائیکی وسیب اچ سرائیکی ثقافت دا ݙینھ (سرائیکی اجرک ڈے) جوش تے جذبے نال ویندا پئے ، ملتان ، مظفر گڑھ، ڈیرہ غازی خان، بہاولپور ، رحیم یار خان ، لیہ ، چوک اعظم ،تونسہ ، راجن پور ، احمد پور شرقیہ ،سودھے کراچی اچ وسݨ آلے سرائیکی ثقافت دے علمبرداراں ولوں سرائیکی کلچر ڈے شایان شان نال منایا ویندا پئے۔ وسیب دے چھوٹے وݙے شہراں اچ نیلی اجرک دی بہار نظر امدی پئی اے جیڑھی ایں خطے دی قدیم تہذیب، امن اتے محبت دی علامت اے۔ وسیب دے مختلف ضلعیاں اتے شہراں اچ سویلے توں تقریبات شروع تھی ڳئن۔ ایندے علاوہ انٹرنیٹ اتے سوشل میڈیا تے وی سرائیکی ثقافت دا رنگ غالب اے۔ مختلف سوشل میڈیا پلیٹ فارمز تے سرائیکی اجرک دا رنگ نظر امدا پئے اتے نینگر نیلی اجرک پا تے آپݨی تصویراں شیئر کر تے مٹی نال جڑݨ دا ثبوت ݙیندے پئن۔  ۔سرائیکی کلچر ڈے دے موقع تے شہر اولیا اچ رنگا رنگ تقریبات دا انعقاد کیتا ڳئے۔ شہر ملتان اچ نیلے رنگ دی سرائیکی اجرک دی بہار آڳئی ، ٻال ، نینگر ، ٻڈھے تے تریمتاں ساریں سرائیکی اجرک ڳل اچ پاتے ماحول کوں نیلڳوں کرݙتے۔