واشنگٹن۔ 15 جون(اے پی پی)امریکا وچ رپبلکن پارٹی دے ممکنہ صدارتی امیدوار ڈونلڈ ٹرمپ ولوں مسلماناں تے پابندی لاونڑ دے بیان تے امریکی صدر براک اوباما سخت ردعمل دا اظہار کریندے ہوئیں آکھیا اے جواوہ امریکا کائنی ہوسی جیرھا اساں چاہندوں۔برطانوی نشریاتی ادارے دے مطابق صدر اوباما ڈونلڈ ٹرمپ دے بیان تے شدید ردعمل دا اظہار کریندیاں آکھیا جو امریکی مسلماناں نال امتیازی سلوک کرنڑ تے امریکا نہ صرف عدم تحفظ دا شکار ہو سی بلکہ ایندے نال مسلم دنیا اتے مغرب وچال خلیج پیدا تھیسی ،اگر اساں سارے مسلماناں کوں ہکی رنگ وچ رنگ ڈیوں اتے ایہ ظاہر کروں جو اساں ہک مذہب نال جنگ کر یندے پیوں ول تاں اساں انہاںسانگے دہشت گرداں دا کم کریندے پئے ہسے ۔انھاں آکھیا جو اگر اساں خوف وچ آ تے اپنڑے ہم وطناں تے اعتماد نہ کریسوں تاں ایہ امریکی تریخ دا شرمناک دور ہو سی۔صدر اوباما آکھیا جو امریکا دی بنیاد مذہبی آزادی تے رکھی گئی ہے اتے مذہبی چھان بین امریکا دے آئین دی خلاف ورزی ہے۔انھاں آکھیا جو ملک وچ تھیونڑ آلے حالیہ دہشت گردی دے واقعے وچ ہک ایجھا بندہ ملوث ہا جیرھا امریکا وچ جمیا ہا ۔صدر اوباما ملک وچ ہتھیاراں دی فروخت تے پابندی عائد کرنڑ تے وی زور ڈتا۔واضح رہوے جو اورلینڈو دے نائٹ کلب وچ مسلح بندے دے ہتھوں درجناں بندیاں دی ہلاکت دے بعد ڈونلڈ ٹرمپ مسلماناں دے حوالے نال اپنڑے مجوزہ منصوبے کوں دہرایا ہائی۔جیندے مطابق اگر اوہ اقتدار وچ آئے تا صدارتی اختیارات استعمال کریندے ہوئیں ہر اوں ملک توں آونڑ آلیاں سانگے پابندی عائد کر سگدے ہن جیندے توں امریکا کوں سکیورٹی دا خدشہ ہوسی۔
