واشنگٹن ۔ 27 اپریل (اے پی پی)عالمی مالیاتی فنڈ (آئی ایم ایف) آکھیا ے جوتیل دیاں قیمتاں وچ گھٹکی نال 2016ء وچ مشرق وسطی اچ تیل برآمد کرنڑ آلے ملکاں کوںممکنہ طورتے 490 ارب توں 540 ڈالر تائیں نقصان پجنڑ دااندیشہ ہے ۔امریکی میڈیا دے مطابق مشرق وسطی اتے وسطی ایشیا وچ آئی ایم ایف دے ڈائریکٹر مسعود احمد ڈسایا جو مشرق وسطی وچ تیل برآمد کرنڑ آلے ملکاں کوں 2015 وچ تیل دی قیمت وچ گھٹکی دی وجہ نال 390 ارب ڈالر دا نقصان تھیا ، تیل دی قیمت وچ گھٹکی جاری رہونڑ دا مطلب، ایں علاقے دے ملکاں خاص طور تے سعودی عرب جئے ملکاں، جنہاں دا اقتصاد حالی تائیں تیل دے پیسے نال بہوں زیادہ وابستہ ہے، دے بجٹ خسارے وچ ودھارا اتے اقتصادی ترقی دی رفتار وچ گھٹکی ہے۔ایں رپورٹ دے مطابق سعودی عرب دا 72فیصد بجٹ تیل ویچنڑ نال حاصل تھینداہے اتے امکان ہے جو رواں سال ایکوں نوے ارب ڈالر دے خسارے دا سامنڑاکرنڑ پوسی۔آئی ایم ایف دی رپورٹ وچ ایویں ای اے وی آکھیا گیا ہے جو 2015 وچ خلیج تعاون کونسل دے رکن ملکاں دی اقتصادی ترقی دی اوسط شرح ترئے اعشاریہ ترئے فیصد رہی جیہڑی اجوکے سال سال گھٹ تھی تے1 اعشاریہ 8 فیصد تھی ویسی ۔ایں رپورٹ وچ توقع ظاہر کیتی گئی ہے جو 2016 وچ ایران دی داخلی ناخالص پیداوار وچ ودھارا 4 فیصد اتے 2017 وچ3 اعشاریہ7 فیصد راہسی۔
