اسلام آباد ۔ 4 مئی (اے پی پی) وزیراعظم محمد نواز شریف آکھے جو اﷲ تعالیٰ دے ڈسائے ہوئے رستے تے قائم راہندے ہوئیں باہمی یگانگت، رواداری اتے یکجہتی دے مظاہرے نال دین تے دنیا اچ عروج حاصل کیتا ونج سگدے ، اختلافات کوں چھوڑ تے اتحاد اتے اتفاق دے نال انسانیت دی فلاح و بہبود کیتے کم کرن تاں اﷲ دی خوشنودی حاصل تھیسی ۔ انہاں اتے گالھ شب معراج دے موقعے تے قوم دے ناں آپنڑیں پیغام اچ آکھی ۔ وزیراعظم آکھیا جو 27 رجب المرجب دی رات معراج النبیۖنال نسبت ہے، واقعہ معراج النبیۖ کوں ہک معجزے دی حیثیت حاصل ہے، ایں رات اﷲ تعالیٰ آپنڑیں برگزیدہ اتے پیارے نبیۖ کوں زمین توں عرش معلیٰ تئیں سفر دی آسانی بخشی ۔ اﷲ دے حکم نال جبرائیل آپۖ کوں مسجد الحرام توں مسجد اقصیٰ گھن تے آئے اتے اتھاں توں سدرة المنتہیٰ تئیں گھن گئے جیندے بعد آپۖ عرش معلیٰ تے اﷲ تعالیٰ دے حضور تشریف گھن گئے ۔ اے انسانی تاریخ اچ ہک ایں طرح دا معجزہ ہے جئیں ساری نوع انسانی کیتے بہوں وڈی بشارت ہے۔ وزیراعظم شاعر مشرق علامہ اقبال دے شب معراج دے حوالے نال شعر دا حوالہ ڈتا جو ”سبق ملا ہے یہ معراج مصطفی سے مجھے۔۔ کہ عالم بشریت کی زد میں ہے گرووں”۔ وزیراعظم آکھیا جوسچی گالھ اے ہے جو اﷲ تعالیٰ معجزہ معراج اچ انساناں کیتے بہوں سارے راز کھول ڈتے ہن اتے انسان کوں شب معراج دے حوالے نال اے سبق ڈتے جو جیکر انسان اﷲ تعالیٰ دے ڈسائے ہوئے رستے تے چلے تاں اوں کوں قرب الٰہی مل سگدا ہے ۔
