راولپنڈی ۔ 4 مئی (اے پی پی) پاکستان اتے اٹلی وچال دفاعی تعاون ودھاونڑ تے اتفاق تھی گئے ۔ اے فیصلہ اٹلی دے سفیر پونٹی کاروو اتے وزیر دفاعی پیداوار رانا تنویر حسین وچال ملاقات اچ کیتا گیا جیہڑا جو بدھ دے ڈینھ وزارت دفاعی پیداوار راولپنڈی اچ تھئی ۔ ڈوہائیں پاسوں ڈوطرفہ تعلقات اتے دفاعی امور تے گالھ مہاڑ کیتی گئی ۔ وفاقی وزیر ڈسایا جو پاکستان دا دفاعی ساز و سامان عالمی معیار دا ہے، جے ایف 17 تھنڈر ایں گالھ دا واضح ثبوت ہے۔ انہاں ڈوہائیں ملکاں وچال دفاعی تعاون دی لوڑ تے زور ڈتا۔ پاکستان اتے اٹلی وچال تذویراتی تعلقات دی منصوبہ بندی بارے ایس ای پی معاہدے تے 2013ء اچ دستخط تھئے ہن جیندے اچ ڈوہائیں ملکاں خاص طور تے دفاع اتے سلامتی تے تعاون ودھاونڑ تے اتفاق تھیا۔
