امب دا برآمدی ہدف ہک لکھ ٹن مقرر

اسلام آباد ۔ 20 جون(اے پی پی) جاری سیزن دے دوران1.6 ملین ٹن امب دی پیداوار متوقع ہے جڈا نجو موجودہ سیزن سانگے امب دا برآمدی ہدف ہک لکھ ٹن مقرر کیتا گئے جیندے نال75 ملین ڈالر توں ودھ دا قیمتی زرمبادلہ کماونڑ وچ مدد ملسی۔امب دے حالیہ برآمدی سیزن دے دوران سعودی عرب،یو اے ای ،مشرق وسطیٰ ،ہانگ کانگ ،سنگاپور،ملائیشیا،کینیڈا ،یورپ اتے سکینڈے نیویا دے ملکاں کوں امب دی برآمد پورے عروج تے ہے جڈانجو جنوبی افریقہ ،جاپان ،امریکا ،روس اتے آسٹریلیا وغیرہ دیاںنویاں منڈیاں وچ رسائی سانگے جامع اقدامات کیتے ویندے پن ۔ گلوبل ٹریڈنگ دے چیف ایگزیکٹو احمد بلال آکھیا جو گزریل سال امب دا برآمدی ہدف حاصل نہیں کیتا ونج جا سگیاہا کیونجو امب دی مقامی پیدوار گھٹ تھئی جیندی وجہ نال صرف 72 ہزار ٹن امب برآمد کیتا ونج جا سگیا پر توقع ہے جو جاری سال بھر پور پیداوار دی وجہ نال امب دا برآمدی ہدف با آسانی حاصل کرگھدا ویسی۔ انہاں آکھیا جو لکڑ دیاں پیٹیاں دی بجائے گتے دے ڈبیاں وچ فروٹاں اتے سبزیاں دی پیکنگ دے حالیہ فیصلے نال وی ملکی برآمدات تے مثبت اثرات مرتب تھیسن۔ انہاں آکھیا جو ایندے نال نہ صرف فروٹاںاتے سبزیاں دے معیار کوں چنگا بناونڑ وچ مدد ملسی بلکہ برآمدی مصنوعات دی چنگیاں قیمتان وی ملسن۔احمد بلال آکھیا جو جاری سیزن دے دوران امب دی برآمدات دا حجم75 ملین ڈالر توں ودھنڑ دی توقع ہے جیندے نال قیمتی زرمبادلہ دے حصول نال ملکی معیشت دے استحکام وچ مدد ملسی۔