پاکستان انہاں 10 ملکاں وچ شامل ہے جیرھے موسمیاتی تبدیلیاں نال دوچار ہن، خصوصی اصلاحی اقدامات کیتے ویسن ،وزیر خزانہ

اسلام آباد ۔ 3 جون(اے پی پی) وفاقی وزیر خزانہ سینیٹر محمد اسحاق ڈار اپنڑی بجٹ تقریر وچ آکھیا جو پاکستان انہاں 10ملکاں وچ شامل ہے جیرھے سیلاب، مینھ دے اوقات کار وچ تبدیلی اتے گرمی دی شدت دی وجہ نال موسمیاتی تبدیلیاں نال دوچار ہن جنہاں دی وجہ نال گزریل کجھ سالاں دے دوران ملک کوں جانی تے مالی نقصان دا سامنڑاکرنڑ پئے۔ انہاں آکھیا جو ماحولیاتی تبدیلیاں دے چیلنجز دا سامنڑاکرنڑ سانگے خصوصی اصلاحی اقدامات اختیار کیتے ویسن۔ وزیر خزانہ آکھیا جو حکومت ”موسمیاتی تغیر مالیاتی ڈھانچہ ” وضع کریندی پئی ہے تاں جوموسمیاتی تبدیلیاں دے حوالے نال حکومت دیاں ذمے داریاں دی عکاسی تھی سگے ۔ انہاں آکھیا جو موسمیاتی تبدیلی دے اخراجات تے نظر رکھنڑ سانگے ہک کوڈنگ میکانزم وی وضع کیتا ویندا پئے جیرھا موسمیاتی تبدیلی تے پالیسی سازاں کوں چنگا اتے وختی فیصلے کرنڑ وچ مدد ڈیسی۔ انہاں آکھیا جو وزارت خزانہ اتے موسمی تغیر ڈویژن انہاں اصلاحات دے نگران ہوسن اتے وفاقی وزارتاں / ڈویژناں کوں وی ایندے وچ شامل کیتا ویسی جیرھاباہمی اشتراک نال موسمیاتی تبدیلی دے حوالے نال اقدامات کریسن۔