وزارت اطلاعات ،نشریات تے قومی ورثہ وچ اعلیٰ سطح دا اجلاس جشن یوم آزادی دے حوالے نال 14 اگست کو ںخصوصی آزادی ٹرین چلاونڑ دیاں تیاریاں دا جائزہ گھدا گیا،یوم آزادی شایان شان انداز وچ منایا ویسی،ادارے قومی نظریے کوں اجاگرکرنڑ سانگے اپنڑاں کردار ادا کرین، وفاقی وزیر اطلاعات، نشریات تے قومی ورثہ سینیٹر پرویز رشید

اسلام آباد ۔ 14 جولائی (اے پی پی) جشن یوم آزادی دے حوالے نال 14 اگست کوںخصوصی آزادی ٹرین چلاونڑ دیاں تیاریاں دا جائزہ گھنڑ سانگے خمیس کوں وزارت اطلاعات ،نشریات تے قومی ورثہ وچ اعلیٰ سطح دا اجلاس منعقد تھیا۔ وفاقی وزیر اطلاعات، نشریات تے قومی ورثہ سینیٹر پرویز رشید اتے وفاقی وزیر ریلوے خواجہ سعد رفیق سانجھے اجلاس دی صدارت کیتی۔ ایں موقع تے سینیٹر پرویزرشید آکھیا جو یوم آزادی شایان شان انداز وچ منایا ویسی۔ انہاںسارے قومی اداریاں تے زورڈتا جو اوہ قومی نظریے کوں اجاگرکرنڑ وچ اپنڑاں کردار ادا کرین۔ خواجہ سعد رفیق آکھیا جو ایں سال آزادی ٹرین سانگے ودھ توں ودھ چنگے انتظامات کیتے ویسن۔ انہاں آکھیا جو آزادی ٹرین دے روٹ اتے شیڈول دی پرنٹ اتے الیکٹرانک میڈیا تے تشہیر کیتی ویسی تاں جو عام لوکاں دی ودھ توں ودھ شرکت کوں یقینی بنڑایاونج جا سگے۔ اجلاس کوں ڈسایا گیا جو آزادی ٹرین پشاور توں شروع تھیسی اتے چاراں صوبیاں توں لنگھنڑ دے بعد ستمبردی ادھ تائیں کراچی وچ ونج پجسی۔ پی ٹی وی ، پی بی سی اتے اے پی پی دے سینئرحکام آزادی ٹرین توںمتعلق تقریبات دی کوریج دے اپنڑے لائحہ عمل بارے اجلاس کوں آگاہ کیتا۔ اجلاس وچ سیکرٹری اطلاعات تے نشریات تے قومی ورثہ سید عمران گردیزی اتے سیکرٹری کابینہ ڈویژن ندیم حسن عارف شرکت کیتی ۔ اجلاس وچ اطلاعات تے نشریات اتے ریلویز دیاں وزارتاں اتے انہاں نال جڑے محکماں دے سینئرحکام وی موجود ہن۔