وزیر اعظم محمد نواز شریف دی تربیلا ڈیم توسیعی منصوبے دے دوران ہلاک تھیونڑآلے چینی انجینئراں دے ٹبراں نال تعزیت

اسلام آباد ۔ 3 جولائی (اے پی پی) وزیر اعظم محمد نواز شریف تربیلا ڈیم توسیعی منصوبے دے تعمیراتی کم دے دوران ہلاک تھیونڑآلے چینی انجینئراں دے ٹبراں نال تعزیت دا اظہار کیتے ۔ اتوار کوں وزیر اعظم ہاوس ولوں جاری کیتے گئے ہک بیان دے مطابق وزیر اعظم محمد نواز شریف متعلقہ حکام کو ںہدایت کیتی ہے جو آنجہانی انجینئراںدیاں لاشاں انہاںدے وطن اتے آبائی علاقیاں اچ پجاونڑ کیتے تیزی نال انتظامات کیتے ونجن۔ وزیر اعظم محمد نواز شریف پاکستان اچ کم کرنڑآلے بئے چینی انجینئراں دی حفاظت اتے بہتری کوں یقینی بنڑاونڑ دی وی ہدایت کیتی ہے ۔وزیر اعظم پاکستان اچ بنیادی ڈھانچے اتے توانائی دے منصوبیاں کوں پورا کرنڑ اچ چینی انجینئراں تے ماہراں دی خدمات دی تعریف کیتی اتے آکھیا جو حکومت پاکستان اتے پاکستانی عوام ملک دی ترقی اتے خوشحالی اچ کردار ادا کرنڑ تے عوامی جمہوریہ چین دی حکومت اتے عوام دے بے حد شکر گزار ہن ۔