ملک اچ تھری اتے فورجی صارفین دی تعداد 32.7 ملین تئیں پج گی، پی ٹی اے

اسلام آباد ۔ 23 ستمبر (اے پی پی) اگست 2016دے چھیکڑ تے ملک اچ تھری اتے فور جی صارفین دی تعداد 32.7ملین ڈالر تئیں پج گی ۔ پاکستان ٹیلی کمیونیکیشن اتھارٹی(پی ٹی اے) دی رپورٹ دے مطابق ملک اچ تھری جی صارفین دی ساریں توں ودھ تعداد رکھنڑ آلی کمپنی موبلی لنک ہے جیں دے صارفین دی تعداد 10.41 ملین ہے جڈاں جو ڈوجھے نمبر تے ٹیلی نار ہے جیرھی8.8 ملین صارفین رکھیندی ہے۔ رپورٹ دے مطابق ژونگ دے تھری جی صارفین دی تعداد 6.75 ملین تئیں پج گی ہے اتے یوفون دے صارفین5.25 ملین ہن۔ پی ٹی اے دے مطابق فورجی دیاں سہولتاں توں فائدہ چاونڑ آلے ژونگ صارفین دی تعداد 9لکھ 21 ہزار 526 جڈاں جو وارد ٹیلی کام دے فور جی صارفین دی تعداد 5لکھ 55 ہزار 167 ہے۔ رپورٹ دے مطابق اگست 2016ءدے دوران ملک اچ موبائل فون دیاں سہولتاں ڈیونڑ آلی ٹیلی کام کمپنیاں دے تھری اتے فور جی صارفین دی تعداد 9لکھ 19ہزار 531دا ودھارا ریکارڈ کیتا گیا ۔