لاہور۔11 دسمبر(اے پی پی )پاکستان کرکٹ بورڈدے ترائے رکنی اینٹی کرپشن ٹریبونل فکسنگ معاملے دی انکوائری اچ عدم تعاون تے قومی کرکٹ ٹیم دے اوپنر ناصر جمشید تے کرکٹ کھیڈنرڑ کیتے ہک سال دی پابندی لا ڈتی اے۔حالی ناصر جمشید تے فکسنگ الزام نئیں لائے گئے۔ او پابندی ختم تھیونڑ توں بعد وی بحالی پروگرام تے مکمل عملدرآمد کیتے بغیر کرکٹ نہ کھیڈ سگسن۔جیکر او پی سی بی دی انکوائری اچ تعاون نئین کریندے تاں پی سی بی ٹربیونل نال رابطہ کرتے انہاں دی پابندی دی سزا ودھاونڑ دا آکھ سگدے۔،انگلینڈ اچ موجود ٹیسٹ کرکٹر اینٹی کرپشن ٹربیونل دے اگو پیش تھین نہ ہی تحقیقات اچ تعاون کیتے۔ناصر جمشید کوں ایں سال 13 فروری کوں معطل کیتا گیا ہا۔ ہک سال دی سزا دا مطلب اے جو انہاں دی معطلی ختم تھیونڑ اچ صرف ڈو مہینے رہ گین۔پی سی بی موجب ناصر جمشید تے پی سی بی دی انکوائر ی اچ عدم تعاون دی شق تے ہک سال دی پابندی لائی گئی اے جڈاں جو انہاں تے اینٹی کرپشن کوڈ دی 2 شقوں دی خلاف ورزی دا الزام ہا۔ پی سی بی دے قانونی مشیر تفضل رضوی میڈیا کوں ڈسائے جو ناصر جمشیدتے پی سی بی نال تعاون نہ کرنڑ دا الزام ثابت تھی گئے۔ پابندی ختم تھیونڑ توں بعد او فوری کرکٹ اچ نہ آسگسن انہاں کو بحالی دے طریقہ کار تے عمل کرنڑا ہوسی۔
