سوچی ۔ 02 دسمبر (اے پی پی)وزیراعظم شاہد خاقان عباسی جمعہ کوں وسط ایشیائی ریاست کرغزستان دے وزیراعظم سفرایزاکوف نال ڈو طرفہ ملاقات کیتی ۔گزریل ڈینھ وزیراعظم کرغزستان دے اپنڑے ہم منصب کوںوزارت عظمیٰ دامنصب سانبھنڑ تے مبارخ ڈتی اتے شنگھائی تعاون تنظیم دی رکنیت وچ پاکستان دے نال تعاون کرنڑ تے کرغزستان دا شکریہ ادا کیتا۔ کرغزستان دے وزیراعظم شنگھائی تعاون تنظیم وچ پاکستان دی شمولیت دا خیرمقدم کیتا اتے اینکوں تنظیم دا ہک چنگااثاثہ قرارڈتا۔ڈوہائیں وزراءاعظم شنگھائی تعاون تنظیم دے فریم ورک اتے ڈو طرفہ بنیادیں تے تعاون کوں فروغ ڈیونڑ دے طریقیاں تے گالھ مہاڑ کیتی ۔ ڈوہائیں رہنماواں کاسا1000 پراجیکٹ سلسلے وچ سارے معاہدیاں تے دستخط تے اطمینان دا اظہارکیتا۔جیندے بعد ہنڑ ایہ منصوبہ عملدرآمد دے مرحلے وچ ہے۔ڈوہائیںفریقاں تجارت اتے دفاع سمیت آپس دی دلچسپی دے سارے شعبیں وچ تعاون کوں ہور ودھ فروغ ڈیونڑ تے اتفاق کیتا۔ انہاں ڈوہائیں ملکاں دے ایوان ہائے صنعت تے تجارت وچال ودھ توں ودھ تعاون تے وی اتفاق ظاہر کیتا۔ وزیراعظم آکھیا جو پاکستان وچ ہائی ویز،موٹرویزدی ترقی نال کرغزستان اتے خطے دے بئے ملکاں کوں وی فائدہ پجسی ۔جیندے نتیجے وچ گوادر اتے پاکستان دیاں بئیاںبندرگاہواں توں رابطے ودھسن۔ ایں سلسلے وچ انہاں پاکستان ، چین ، کرغزستان اتے قزاخستان وچال ٹرانزٹ معاہدے وچ4فریقی ٹریفک دی اہمیت تے وی روشنی پاتی۔ وزیراعظم اقتصادی تعاون تنظیم دے خطے وچ رابطیاں دے فروغ ڈیونڑ تے وی زور ڈتا جیندے ڈوہائیںملک رکن ہن۔ پاکستان ایں ویلھے ایں تنظیم دی قیادت کریندا پئے ۔ فریقین پاکستان اتے کرغزستان وچال پکی شراکت داری دے قیام نال اتفاق کیتا۔ انہاںکرغزستان دے وزیراعظم کوں دورہ پاکستان دی دعوت ڈتی جیرھی انہاں قبول کرگھدی۔
