ملتان ۔11 اپریل (اے پی پی)ٹورازم ڈویلپمنٹ کارپوریشن آف پنجاب (ٹی ڈی سی پی) تونسہ بیراج تے 9ہزار ایکڑ دی جھیل تے ہک نواں جزیرہ اتے تفریح گاہ بنڑاونڑ دی تجویز ٹی ڈی سی پی ہیڈآفس لاہور بھجوائی اے جتھاں ہر ویلھے دریائے سندھ تے پورے جنوبی پنجاب توں لوک تفریح کیتے آندن۔ایں سانگے ٹی ڈی سی پی ملتان علاقے دا سروے کرتے فزیبلٹی رپورٹ لاہور بھجواڈتی اے۔نویں جزیرے اتے ریزارٹ تے پجنڑ کیتے دریا کنارے توں ڈو کلومیٹرتئیں کشتیاں تے ونجنڑا ہوسی جتھاں فیملیز کیتے ہٹس وی موجود ہوسن اتے تفریح دا بیا سامان ہوسی۔علاقے اچ مرغابی، جنگلی ہرن ، جنگلی سور، بٹیر اتے مسافر پرندیاں دی موجودگی پاروں ہنٹنگ پوائنٹس ، جیپ سفاری دے علاوہ ٹینٹ ویلج اتے رات کوں باربی کیو انتظامات دی وی تجویز اے ۔تونسہ بیراج دا پانڈ ایریا اتے مجوزہ آئی لینڈ دی جاہ محکمہ انہاردی ملکیت اے۔
