راجن پور، دہشتگرداں دی پولیس گاڈی تے فائرنگ،5اہلکار شہید

راجن پور۔ 11 نومبر (اے پی پی) ضلع راجن پور دی تحصیل روجھان مزاری اچ عربی ٹبہ دے نیڑے کالعدم بی ایل اے دے دہشتگرداں دی پولیس گاڈی تے فائرنگ،ڈو پولیس اہلکاراں سمیت 5بندے شہیدتھی گئے ۔ ڈی پی او راجن پور احسن سیف اللہ ”اے پی پی “کوں ڈسیا جو دہشت گرداں دی علاقے اچ ہوونڑ دی اطلاع تے پولیس اہلکار انہاں کوں گولیندے ودے ہن جو رستے اچ لُکے ہوئے دہشت گرداں انہاں تے فائرنگ کر ڈتی۔انہاں ڈسیا جو شہید تھیونڑ آلیاں اچ ایلیٹ فورس دے اے ایس آئی ثقلین اتے ہیڈ کانسٹیبل علمدار شاہ توں علاوہ ثاقب، زاہد اتے نواز شبانی شامل ہن۔انہاں ڈسیا جو شہید تھیونڑ آلیاں دی میتاں کوں ڈی ایچ کیو ہسپتال راجن پور اچ پوسٹ مارٹم دے بعد ورثاءدے حوالے کر ڈتا گئے۔انہاں آکھیا جو علاقے کوں گھیرے اچ گھن گھدا گئے اتے جلدی ملزماں کوں پکڑ گھدا ویسی۔انہاں ڈسایا جو ملزمان ریلوے ٹریک تے بارودی مواد رکھنڑ دے علاوہ دہشت گردی دے بے واقعیاں اچ ملوث ہن۔