پاکستان اتے آسٹریلیا داپہلاٹیسٹ خمیس کوں شروع تھیسی

برسبین ۔ 20 نومبر (اے پی پی) پاکستان اتے آسٹریلیا دیاں کرکٹ ٹیماں دا ڈو ٹیسٹ میچاں سی سیریز دا پہلا ٹیسٹ (اج)خمیس توں برسبین اچ شروع تھیسی۔ ایں توں پہلے آسٹریلیا اچ گرین شرٹس میزبان ٹیم دے خلاف 35 میچز کھیڈن جیندے اچوں او صرف 4 ٹیسٹ میچز جیت سگی جڈاں جو کینگروز 24 میچز جیتن اتے ست ڈرا تھین۔پاکستان چھیکڑی واری 1995ءاچ کینگروز دے خلاف آسٹریلیا اچ کوئی ٹیسٹ جیتا ہا۔برسبین اچ حالی تئیں پنج اچوں قومی ٹیم کوئی وی ٹیسٹ نئیں جیتی۔جیندے اچ میزبان آسٹریلیا 4 میچزجیتن اتے ہک ڈرا تھئے۔پہلے ٹیسٹ اچ قومی ٹیم اظہر علی دی قیادت اچ کھیڈسی جیندے اچ اسد شفیق، بابر اعظم، عابد علی، حارث سہیل، افتخار احمد، امام الحق، عمران خان، کاشف بھٹی، محمد عباس، محمد رضوان، محمد موسیٰ، نسیم شاہ، شاہین آفریدی، شان مسعود اتے یاسر شاہ شامل ہین۔ٹیسٹ میچ توں پہلے قومی ٹیم آسٹریلیا اچ ڈو وارم اپ میچ کھیڈن اتے چنگی کارکردگی ڈکھائی اے۔اسد شفیق ڈوہاں میچاں اچ سنچری کیتی اے، بابر اعظم وی سنچری کرچکین جڈاں جوپاکستانی بلے بازاں افتخار احمد اتے شان مسعودوی چنگے رہین۔میچ اچ آسٹریلوی ٹیم دے کپتان ٹم پین ہوسن اتے بئے کھیڈاڑیاں اچ سٹیو سمتھ، ڈیوڈ وارنر، مچل سٹارک، نیتھن لائن، پیٹ کمنز اتے جوش ہیزلووڈ شامل ہین۔ڈوجھا ٹیسٹ میچ 29 نومبرتوں 3 دسمبر تئیں ایڈیلیڈ اچ تھیسی۔