برسبین ۔ 19 نومبر (اے پی پی) پاکستان اتے آسٹریلیا دیاں کرکٹ ٹیماں وچال ڈو ٹیسٹ میچاں تے مشتمل سیریز دا پہلا ٹیسٹ خمیس کوں برسبین اچ شروع تھیسی، پاکستانی ٹیم اظہر علی دی قیادت اچ میدان اچ لہسے جڈاں جو بئے کھلاڑیاں اچ اسد شفیق، بابر اعظم، عابد علی، حارث سہیل، افتخار احمد، امام الحق، عمران خان، کاشف بھٹی، محمد عباس، محمد رضوان، محمد موسیٰ، نسیم شاہ، شاہین آفریدی، شان مسعود اتے یاسر شاہ شامل ہن۔ ٹیسٹ سیریزتوں پہلے کھیڈیے گے ڈو ٹور میچاں اچ پاکستانی بلے بازاں دی کاکردگی بہوں شاندار رہی ، سنیئر بلے باز اسد شفیق ڈوہیں وارم اپ میچاں اچ سنچریاں بنڑائیاں، بابر اعظم پہلے میچ اچ 157 رنز دی ناقابل شکست اننگز کھیڈی ، افتخار احمد اتے شان مسعود وی چنگی بیٹنگ دا مظاہرہ کیتے۔ آسٹریلوی ٹیم دی قیادت دے فرائض ٹم پائن انجام ڈیسن جڈاں جو بئے نمایاں کھلاڑیاں اچ سٹیو سمتھ، ڈیوڈ وارنر، مچل سٹارک، نیتھن لائن، پیٹ کمنز اتے جوش ہیزلووڈ شامل ہن۔ ڈوہیں ٹیماں وچال ڈوجھا تے چھیکڑی ٹیسٹ 29 نومبر توں 3 دسمبر تئیں ایڈیلیڈ اچ کھیڈیا ویسی۔
