اسلام آباد ۔ 11 دسمبر (اے پی پی) سٹیٹ بینک دے غیر ملکی زرمبادلہ دے ذخیرے ایشیائی ترقیاتی بینک توں قرضے دی رقم ملنڑ دے بعد پچھلے 10مہینے اچ ساریں توں اتلویں سطح تے پج گن ۔سٹیٹ بینک دے اعلامیے دے مطابق ایشیائی ترقیاتی بینک ولوں ہک ارب 30 کروڑ ڈالر دی رقم وصول تھیونڑ دے بعد ہنڑ مرکزی بینک دے غیر ملکی زرمبادلہ دے ذخیرے 10 ارب41 کروڑ 20 لکھ ڈالر تھی گن جڈاں جو غیر ملکی زرمبادلہ دے مجموعی ذخیرے 17 ارب 29 کروڑ 30 لکھ ڈالر ریکارڈ کیتے گن ۔ مرکزی بینک دے غیر ملکی زرمبادلہ دے ذخیرے اجوکے سال مارچ دے بعد ساریں توں اتلی سطح تے پجن ۔ نومبر دے چھیکڑ تے غیر ملکی زرمبادلہ دے ذخیرے 15ارب 99کروڑ 30لکھ ڈالر تے سٹیٹ بینک دے زرمبادلہ دے ذخیرے 9ارب 11کروڑ 20لکھ ڈالر ہن ۔۔
