ملتان ۔30 جنوری (اے پی پی) معروف ڈریس ڈیزائنر اویس نجم آکھیا جو اساں کپڑیاں دے شعبے اچ سرائیکی کلچر نال بین الاقوامی برانڈز دی اجارہ داری مُکا ڈیسوں۔اپنڑے ملتان دے دورے دے موقع تے اے پی پی نال گالھ مہاڑ کریندیں ہوئیں انہاں آکھیا جو اساں ماہی پروڈکشن دے ناںنال ملبوسات دی ڈیزائننگ دا ادارہ بنڑائے جئیں نال اساں علاقائی ثقافت کوں فروغ ڈیندے پیوں اتے دیہات اچ بیٹھی ہنر مند تریمتیں کوں روزگار وی ڈیندے پیوں۔انہاں آکھیا جو اے ملبوسات پورے وسیب اچ سستے نرخاں تے متعارف کرویندے پیوں اتے ایں نال مقامی ثقافت وی اجاگر تھیسی۔اویس انجم ہک سوال دے جواب اچ آکھیا جو مارکیٹ اچ سستا کپڑا گھن کراہیں معمولی کم دے بعد مہانگا ویچیا ویندے جئیں نال نہ صرف عام بندے نی گھن سگدے اتے وسیب دی تریمتیاں دی حق تلفی وی تھیندی اے۔انہاں آکھیا جو اجاں اساں بہاولپور توں کم شروع کیتے اتے بہوں جلدی ملتان،ڈیرہ غازی خان اتے سرائیکی خطے دے بے علاقیاں اچ وی اپنڑی برانچاں بنڑیسوں اتے اپنڑی ثقافت پوری دنیا کوں ڈکھیسوں۔
