اسلام آباد ۔ 21 جنوری (اے پی پی) سرائیکی دے معروف شاعر امان اللہ ارشد دے اعزاز اچ نیشنل پریس کلب ولوں منگل کوں ہک تقریب کیتی گئی ۔صدرنیشنل پریس کلب شکیل قرار ، نائب صدر ڈاکٹر سعدیہ کمال ، دانشور تے اسکالر محمود مہے، صحافی غضنفر عباس انہاں دی شخصیت اتے فن تے گالھ مہاڑ کیتی جڈانجو صحافیاں اتے بے احباب سوال کیتے۔ایں موقع تے معروف شاعر امان اللہ ارشد آکھیا جو میڈی شاعری اچ سرائیکی دھرتی، روہ ، روہی ،تھل دمان ، بیٹ ، بیلا دا رنگ بہوں نشابر اے۔ رومانویت اتے احتجاج ،لاشعوری یا شعوری طورتے کوشش کرینداں جو ڈوہرے اتے غزل اچ میڈا رنگ وکھرا ہووے۔انہاں آکھیا جو میں چوتھی جماعت اچ پڑھدا ہم تاں میکوں شاعری دا شوق تھیا جڈانجو1981ءتوں باقاعدہ شاعری شروع کیتی، صوفی فیض محمد دلچسپ میڈے استاد ہن اتے انہاں توں بہوں کجھ سکھیے۔ڈوہڑہ میڈی پسندیدہ صنف سخن اے جڈانجوغزلاں،قطعے،سرائیکووی بہوں لکھین۔انہاں آکھیا جو ہنڑ تئیں میڈی شاعری دی پنج کتاباں ”دھمال“ سک دا ساون“، اکھیں خواب جگارے،ارشد دے ڈوہڑے“چھپ کراہیں مارکیٹ اچ آگئین جڈانجو نعتیہ کلام کتابی شکل اچ سامنڑے آ ویسی۔ نیشنل پریس کلب دے صدر شکیل قرار مزماناں دا شکریہ ادا کیتا۔انہاں آکھیا جو امان اللہ ارشد سرائیکی زبان دے مٹھے لہجے دے بہوں چنگے شاعر ہن۔سرائیکی وسیب سانگے انہاں دی خدمات تعریف دے قابل ہن۔ ڈاکٹر سعدیہ کمال آکھیا جو انہاں دی شاعری رومانیت اتے مزاحمت دا حسین مرقو اے۔او ملنسار،شائستہ مزاج اتے خوش گفتار انسان ہن۔محمود مہے آکھیا جو امان اللہ ارشد اپنڑی شاعری اچ عام بندے دی ڈکھ درد دی گالھ کیتی اے۔تقریب اچ نذر عباس بلوچ، خادم حسین، غضنفر ہاشمی،ساجد دمانی، حمید لنگرا،جاوید غفاری، صابر ملک، دلشاد محور، جنید بزدار، شاہد قریشی،محمد عمران ، ظفر قادر، رزاق سیال، محمد ریاض،ظفر بھٹہ،یعقوب علوی، خالد ایازمحمد رفیع توں علاوہ جاڑے شہراں اچ رہنڑ آلی سرائیکی کمیونٹی دی وڈی تعداد شریک تھئی۔ صدر نیشنل پریس کلب شکیل قرار مزمان کوں اعزازی شیلڈ پیش کیتی جڈڈانجو محمدرفیع ’ سرائیکی پگ اتے شاہد دھریجہ سرائیکی نیلی اجرک پوائی۔
