پروفیسر شوکت مغل دے علمی کارنامے ہمیشہ تاریخ دا حصہ رہسن، شاہد دھریجہ
اسلام آباد ۔ 3 جون (اے پی پی)سرائیکستان قومی کونسل دے چیئرمین ، ماہر تعلیم و ماہر لسانیات پروفیسر شوکت مغل انتقال کر گئن ، انہاں دی عمر70سال ہئی ۔پروفیسر شوکت مغل 60کتاباں دے مصنف ہن ، 50کتاباں سرائیکی لسانیات تے مشتمل ہن ، انہاں ڈینھاں پروفیسر شوکت مغل ست جلداں تے مشتمل جامع سرائیکی لغت تے بہوں اہم کم کریندے پئے ہن ۔ انہاں سرائیکی تحریک اتے شعبہ تعلیم کیتے ودھ ساری خدمات سرانجام ڈتیاں ۔ او مختلف اخبارات، رسائل و جرائد اچ بطور کالم نگار اتے ریڈیو ، ٹی وی نال وی جڑیے رہیے ۔ سرائیکی ادبی اکیڈمی دی صدر ڈاکٹر سعدیہ کمال اتے جنرل سیکرٹری شاہد دھریجہ پروفیسر شوکت مغل دی فوتکی تے ڈکھ دا اظہار کریندے ہوئیں آکھیے جو او اپنڑے عہد دے عظیم دانشور ہن انہاں دی ادبی خدمات ہمیشہ یاد رکھیاں ویسن ، پروفیسر شوکت مغل سرائیکی علم و ادب اچ کئی پہلواں توں بانی شمار تھیندے ہن انہاں کوں تاریخ ادب اچ سرائیکی دا قیمتی اثاثہ شمار کیتا ویندا پئے ۔ انہاں دے فوت تھیونڑ پاروں سرائیکی ادب دے محبان کوں ڈکھ نال ڈو چار کیتے ۔ انہاں تحقیق و تنقید دے میدان اچ اداریں توں ودھ کلہا بہوں کم کیتا تے طلبہ و طالبات کیتے ودھ سارا علمی تے ادبی ورثہ چھوڑ گئن ۔ مرحوم پسماندگان اچ ذال ، ڈو پتر ترائے دھیریں چھوڑیئن۔ اللہ تعالیٰ سئیں مرحوم کوں جنت اچ جاہ ڈیوے تے انہاں دے خاندان کوں صبر ڈیوے ۔
