ملتان دے معروف خطاط ، مصور تے معمار حافظ محمد اقبال بھٹی اللہ کوں پیارے تھی گئے

ملتان۔25جون(اے پی پی)ملتان دے معروف خطاط ، مصور تے معمار حافظ محمد اقبال بھٹی اللہ کوں پیارے تھی گئے۔انہاں دی نماز جنازہ سائیں موتی والا قبرستان 14 نمبر چونگی ملتان اچ پڑھا ڈتی گئی ،مرحوم اپنڑے لواحقین اچ ڈو پتر محمد بلال شاہد ، محمد وقاص مجاہد،پنج دھیریں اتے ہک بیوہ سوگوار چھوڑی اے۔ مرحوم دی روح کوں ایصال ثوب سانگے قل خوانی 26 جون 2020 ءسویلے ست وجے مسیت اویسیہ محلہ رسول پورہ گلی نمبر 1 چونگی نمبر 14 ملتان اچ تھیسی۔ نماز جنازہ اچ سرائیکستان قومی کونسل دے صدر ظہور دھریجہ سمیت سینکڑاں بندے شریک تھیے۔ایں موقع تے گالھ مہاڑ کریندیں ہوئیں ظہور دھریجہ آکھیاجو حافظ محمد اقبال بھٹی معروف ماہر لسانیات پروفیسر شوکت مغل مرحوم دے نیڑے دے ساتھی اتے یار ہن۔ پروفیسر شوکت مغل دی وفات نال انہاں کوں بہوں صدمہ تھیا ہئی ۔پروفیسر شوکت مغل دی کتاب اصطلاحات پیشہ وران اچ حافظ محمد اقبال بھٹی دی تصویراں اتے تعاون کیتی ہئی ۔ ظہور دھریجہ آکھیا جو حافظ محمد اقبال بھٹی وڈے آرٹسٹ تھیونڑ دے نال نال بہوں چنگے بندے ہن اتے وسیب دی شرافت،دیانت اتے امانت دی رایت دے امین ہن۔ حافظ محمد اقبال بھٹی ہک بہوں وڈا پراجیکٹ شروع کیتا ہئی ،او دیوان فرید دے شعر کوں کلر مصوری اچ کریندے پئے ہن ۔