ملتان۔ 31 جولائی (اے پی پی)کمشنر ملتان ڈویژن شان الحق مویشی منڈیاں دا دورہ کیتے اتے اتھاں بیوپاریاں کوں ڈتیاں گیاں سہولتاں داجائزہ گھدا۔ انھاں آکھئے جوکورونا کنٹرول ایس او پیز تے ہرصورت اچ عملدرآمد کروایاویسی۔ نو ماسک نو سروس دے سلوگن دی پاسداری واضح نظر آونڑی چاہیدی اے۔ شہری وی کانگو وائرس اتے کورونا وائرس توں بچنڑ کیتے انتظامیہ دا ساتھ ڈیون۔ بڈڑھے تے بالاں کوں منڈیاں اچ ونجنڑ توں بچنڑاں چاہیدا اے۔ایں توں بعدکمشنر شان الحق ویسٹ مینجمنٹ کمپنی دے کیمپس داوی دورہ کیتا۔انھاں ہدایت ڈتی جوعید تے شہر اچ بہترین صفائی نظرآونڑی چاہیدی اے۔شہری ویسٹ مینجمنٹ کمپنی دے 1139, میٹروپولیٹن کارپوریشن دے 2020 ٹال فری نمبر تے کال کرتے شکایتاں درج کرواسگدن۔ انھاں شہریاں توں وی اپیل کیتی جو سنت ابراہیمی دی ادائیگی دے بعد الائیشیں کمپنی ولوں مہیا کیتے گئے شاپر اچ سٹن یا کمپنی کوں کال کرن۔ گٹراں اچ سٹنڑ یا گلیاں سڑکاں تے نہ سٹن ۔شہریاں دے تعاون نال بہترین صفائی کوں یقینی بنڑایا ونج سگدا ا ے۔ کمشنر پورے شہر دا دورہ کر تے صفاءبارے انتظامات داجائزہ گھدا۔
