سرائیکستان قومی کونسل ولوں آزادی دے ڈینھ تے سیمینار

ملتان۔14اگست(اے پی پی سرائیکی سروس) سرائیکستان قومی کونسل ولوں آزادی دے ڈینھ تے سیمینار ملتان اچ تھیا۔سیمیناردی صدارت سرائیکستان قومی کونسل دے صدر ظہور دھریجہ کیتی۔تقریب دی نظامت زبیر دھریجہ کیتی۔تقریب نال سرائیکی رہنما شریف خان لشاری ،معروف سرائیکی شاعر و براڈ کاسٹر اکبر ہاشمی ، ماہر تعلیم طارق شاہ جیلانی ، مہر اجمل خاموش، صابر شفیق، حاجی عید احمد دھریجہ، اعظم سومرو شاہجمالی ،روبینہ بخاری، عار ف گلشن خطاب کیتا۔ جڈانجو معروف سرائیکی گلوکار اجمل ساجد، ثوبیہ ملک ، قاسم شہزاد اتے محمد اکرم حسین اپنڑی آواز دا جادو جگایا۔ایں موقع تے سرائیکی رہنماواں خطاب کریندیں ہوئیں آکھیا جو سرائیکی قومی پاکستان نال محبت کریندے اے جئیں ملک سانگے ساریاں توں ودھ قربانیاں ڈتن۔انہاں آکھیا جو پاکستان بنڑنڑ دے بعد بہاولپور دی ریاست ساریاں توں ودھ قربانیاں ڈتھین اتے قائداعظم فرمایا ہئی جو پاکستان بنڑنڑ توں پہلے اتھاں پاکستان ریاست بہاولپور دی شکل اچ ہئی ۔سرائیکی رہنماواں اکھیا جو اج ایں گالھ دی بہوں لوڑھ اے جو پاکستان اچ وسنڑ آلی سارے قوماں کوں ہکو سویں حقوق ڈتے ونجن،سرائیکی سودھا سارے علاقائی زباناں کوں قومی زباناں دا درجہ ڈتا ونجے اتے انہاں زباناں دی ترقی سانگے ادارے بنڑائے ونجن۔